පළමු NTNSP කොන්ත්‍රාත්තුව Jyoti Structures සහ Hayleys Fentons වෙත පිරිනැමීමේ සමාරම්භක අවස්ථාව

ඉන්දියාවේ ජියෝති ස්ට්‍රක්චර්ස් ලිමිටඩ් (Jyoti Structures Limited) ප්‍රධාන හවුල්කරු ලෙසත්, ශ්‍රී ලංකාවේ අංක 1 සූර්ය බලශක්ති විසඳුම් සපයන සහ MEP අංශයේ ප්‍රමුඛතම ආයතනය වන හේලීස් ෆෙන්ටන්ස් ලිමිටඩ් (Hayleys Fentons Limited) සමග එක්ව මන්නාරම - මුලිකුලම් 220kV ද්විත්ව පරිපථ සම්ප්‍රේෂණ රැහැන් පද්ධතිය ඉදිකිරීම සඳහා ඒකාබද්ධ ව්‍යාපෘති ගිවිසුමකට පසුගියදා අත්සන් තැබීය. 
අලු‍තින් පිහිටුවන ලද “නැෂනල් ට්‍රාන්ස්මිෂන් නෙට්වර්ක් සර්විස් ප්‍රොවයිඩර්“ (NTNSP) ආයතනය විසින් ‘මුලිකුලම් සුළං බලශක්ති සම්ප්‍රේෂණ ව්‍යාපෘතිය’ යටතේ පිරිනමන ලද ප්‍රථම කොන්ත්‍රාත්තුව මෙය වීමද විශේෂත්වයකි.
මෙම ව්‍යාපෘතියේ මූලික අරමුණ වන්නේ මුලිකුලම් සුළං බලශක්ති ව්‍යාපෘතිය හරහා නිපදවන විදුලිය ජාතික විදුලිබල පද්ධතියට එක් කිරීමට අවශ්‍ය යටිතල පහසුකම් සංවර්ධනය කිරීමයි. ව්‍යාපෘතිය අවසන් වූ පසු ජාතික විදුලිබල පද්ධතියේ ස්ථාවරත්වය තහවුරු වන අතරම, පුනර්ජනනීය බලශක්තිය වැඩි වශයෙන්  විදුලිබල පද්ධතියට එක්කර ගනිමින්, ලංකාව තිරසාර බලශක්ති ඉලක්ක කරා මෙහෙයවීමට මෙය මහඟු‍ පිටුවහලක් වනු ඇත.
මේ පිළිබඳව අදහස් දක්වමින් ජියෝති ස්ට්‍රක්චර්ස් සමාගමේ ප්‍රධාන මෙහෙයුම් නිලධාරී අමිත් දත්තා මහතා මෙසේ සඳහන් කළේය.
“අධි වෝල්ටීයතා සම්ප්‍රේෂණ ක්ෂේත්‍රයේ අප සතු පුළුල් අත්දැකීම්, හේලීස් ෆෙන්ටන්ස් වැනි ප්‍රමුඛ පෙළේ ශක්තිමත් හවුල්කරුවකු සමග එක්ව  ලංකාවේ බලශක්ති අනාගතය වෙනුවෙන් යෙදවීමට ලැබීම අපට විශාල සතුටක්” ලෙසයි.
මෙම සුවිශේෂී සන්ධිස්ථානය පිළිබඳව හේලීස් ෆෙන්ටන්ස් ලිමිටඩ් ආයතනයේ කළමනාකාර අධ්‍යක්ෂක හසිත් ප්‍රේමතිලක මහතා ප්‍රකාශ කර සිටින්නේ, මෙම ගිවිසුම  ලංකාවේ බලශක්ති අනාගතය වෙනුවෙන් තැබූ දැවැන්ත  පියවරක් බවයි.
”‍මන්නාරම - මුලිකුලම් සම්ප්‍රේෂණ රැහැන් පද්ධතිය යනු උතුරේ පවතින සුළං බල සම්පත ජාතික විදුලිබල පද්ධතිය කරා රැගෙන යන ප්‍රධානතම සම්ප්‍රේෂණ මාර්ගයයි. අප ආයතනය මගින් මන්නාරමේ ක්‍රියාත්මක කරන මෙගාවොට් 50ක සුළං බලශක්ති ව්‍යාපෘතියට සමගාමීව, රටේ පුනර්ජනනීය බලශක්ති ගමනට විවිධ අයුරින් දායක වීමට ලැබීම අප ලැබූ විශාල ජයග්‍රහණයක්,”‍ යැයි ඔහු වැඩිදුරටත් පැවසීය.
යටිතල පහසුකම් ක්ෂේත්‍රය වෙත පිවිසීම පිළිබඳව අදහස් දැක්වූ හේලීස් සෝලාහි විධායක අධ්‍යක්ෂක සහ ප්‍රධාන විධායක නිලධාරී රොෂේන් පෙරේරා මහතා සඳහන් කළේ, මෙය ආයතනය ගමන් මගෙහි නව පරිච්ඡේදයක ආරම්භයක් බවයි.
“මෙම ව්‍යාපෘතිය හරහා අපගේ ඉංජිනේරු කණ්ඩායමට විදුලි සම්ප්‍රේෂණය හා බෙදාහැරීමේ ක්ෂේත්‍රය පිළිබඳව සුවිශේෂී ප්‍රායෝගික පුහුණුවක් සහ නව දැනුමක් ලබා ගැනීමට අවස්ථාව ලැබෙනවා. එමගින් අනාගතයේදී මෙවැනි මහා පරිමාණ යටිතල පහසුකම් ව්‍යාපෘති සාර්ථකව ක්‍රියාවට නැංවීමට අපගේ ආයතනය සතු හැකියාව තවදුරටත් වර්ධනය වනු ඇතැයි මා විශ්වාස කරනවා,”‍ යැයි ඔහු වැඩිදුරටත් පැවසීය.