ඉන්දියා - ශ්‍රී ලංකා සබඳතා ඉදිරියේ උපාය මාර්ගිකව වැදගත්වන ඉදිරි සැලසුම් සමාලෝචනය කරන විද්වත් සංවාදයක් පසුගියදා කොළඹ දී පැවැත්විණි. පාත්ෆයින්ඩර් පදනම සහ ඉන්දියාවේ අනන්තා ඇස්පන් මධ්‍යස්ථානය එක්ව මෙය සංවිධානය කළේය. 
ඉන්දීය අග්‍රාමාත්‍ය නරේන්ද්‍ර මෝදි මහතා ලබන මස මුල් සතියේ මෙරට සංචාරය කිරීමට නියමිතව ඇති අතර එයට පෙර එහි පසුබිම හා අන්තර්ගතය සලකා මෙම සංවාදය පවත්වන ලද බව පාත්ෆයින්ඩර් පදනම නිවේදනය කරයි. අනාගතයේදී ඉන්දු - ශ්‍රී ලංකා සබඳතාවලට සහ කලාපීය වශයෙන් වැදගත්වන නව අදහස් සැලකිය යුතු ලෙස මෙම උපාය මාර්ගික සංවාදය හේතුකොටගෙන ඉදිරිපත් වූ බව සැලකේ.  
අනන්තා ඇස්පන් මධ්‍යස්ථානයේ සභාපති ආචාර්ය නවුෂාඩ් ෆෝබ්ස්, පාත්ෆයින්ඩර් පදනමේ සභාපති බර්නාඩ් ගුණතිලක, අනන්තා ඇස්පන් හි ප්‍රධාන විධායක ඉන්ද්‍රාන් භක්ෂි, ඇතුළු දෙරට නියෝජනය කරන විද්වත් කණ්ඩායමක් ද්වී පාර්ශවිකව වැදගත් වන ක්ෂේත්‍ර කිහිපයක් අලලා අදහස් ඉදිර්පත් කර ඇත. 
ලෝකයේ ප්‍රධාන බලවත් රාජ්‍යයන්  දකුණු ආසියානු කලාපයට එල්ල කර ඇති බලපෑම තුලනය කිරීම, ඉන්දු -ලංකා ධීවර ආරවුල, ඉන්දියන් සාගරයේ නාවික ගමනාගමනය සුරක්ෂිත කිරීම හා ආරක්ෂක සහයෝගීතාව, ශ්‍රී ලංකාවේ යටිතල පහසුකම් සංවර්ධනය සඳහා ඉන්දියාවේ භූමිකාව සහ ඩිජිටල් පාලනයේ හොඳම භාවිතය හා තාක්ෂණය හැඩගැස්වීමට දෙරටටම පවතින අවස්ථා වැනි ද්වී පාර්ශවිකව තීරණාත්මක කරුණු සහභාගිකයන්  මෙහි දී සාකච්ඡා කර ඇත. ජාත්‍යන්තර මුල්‍ය අරමුදලේ සැලැස්ම අවසන්වීමෙන් පසු ආර්ථික වර්ධනයක් අරමුණු කරගෙන දෙරට අතර තෝරාගත් ක්ෂේත්‍රවල සහයෝගීතාවක් ගොඩනැගීම කෙරෙහි ද මෙහි දී අදහස් හුවමාරු කරගෙන ඇති. බව පාත්ෆයින්ඩර් පදනම නිවේදනය කරයි.
ශ්‍රී ලංකා ඉන්දියා රාජ්‍ය තාන්ත්‍රික සම්බන්ධතා සම්බන්ධයෙන් මෙරට හිටපු ඉන්දීය මහ කොමසාරිස් යශ්වර්ධන කුමාර් සිං මහතා අදහස් ඉදිරිපත් කරන ලද අතර ඉන්දියන් සාගර කලාපයේ උපායශීලී හවුල්කාරීත්වය මැයෙන් පාත්ෆයින්ඩර් පදනමේ අධ්‍යක්ෂ අහමඩ් ඒ. ජවාඩ් මහතා කරුණු දක්වා තිබේ. මෙම විද්වත් සංවාදය හා සමාන්තරව පාත්ෆයින්ඩර් පදනම නිර්මාතෘ මිලින්ද මොරගොඩ මහතා ආරාධිතයන් සමග පසුගිය කාලයේ පාත්ෆයින්ඩර් හා අනන්තා ඇස්පන් සහයෝගීතාවෙන් සංවිධානය කළ සංවාද දෙකක ප්‍රගතිය සමාලෝචනය කරන ලද අතර හතරවැනි වටය සඳහා අවධානය යොමු කළ යුතු අංශ ගැන ද එහි දී අදහස් හුවමාරු කරගෙන තිබේ.