කරන්දෙණිය එම්.සුසිල් පියන්ත

සුන්දර මාදු ගඟේ ගං ඉවුරක් පාදක කර ගනිමින් එතෙක් මෙතෙක් ඉතිහාසය තුළ ඉදිවූ අංගසම්පූර්ණ දැවැන්තම හෝටල් සංකීර්ණය වන මාදු රිවර් රීච් හෝටල් සංකීර්ණය බලපිටිය හීනටියේදී පසුගියදා විවෘත කෙරිණ.
විශේෂිත ආරාධිතයන් සහභාගී කරවා නොගෙන හෝටලය තැනූ සේවකයන් හා ඔවුනගේ පවුල්වල අය සහභාගි කරවා ගනිමින් ආගමට දහමට මුල්තැන දෙමින් සර්ව රාතික පිරිත් සජ්ජායනාවක් පවත්වා මහා සංඝගත දක්ෂිණාවක් ද සිදු කොට මේ සිව් මහල් හෝටල් සංකීර්ණය විවෘත කිරීම විශේෂයෙන්ම කැපී පෙනේ.
සිත් ගන්නා මනරම්වූත්, මනස්කාන්තවූත් පරිසරයකින් සමන්විත බලපිටිය හීනටියේ මාදු ගඟේ ගං ඉවුරක් පාදක කර ගනිමින් මාදු රිවර් රීච් හෝටල් සංකීර්ණය ඉදිකර ඇති අතර ගං ඉවුරේ ඇති කිසිදු කඩොලාන ශාකයකටවත් හානියක් සිදු නොකොට කඩොලාන ශාක පද්ධතියට ද ආලෝකයක් ගෙන දෙන ආකාරයට මේ හෝටල් සංකීර්ණය ඉදිකිරීමට මෙහි හිමිකරු වන පාලිත පියංකර මහතා පියවර ගෙන තිබේ. 
මේ සංචාරක හෝටලය උත්සව ශාලා දෙකකින් සහ අවන්හල් දෙකකින් සමන්විතය. හෝටලය අංග සම්පූර්ණ කාමර දහයකින් යුක්තය. පරිසර හිතකාමී බෝට්ටු සේවාවක් ද සිය හෝටලයට අනුබද්ධිතව පවත්වාගෙන යනු ලබන බව එහි හිමිකරු වන පාලිත පියංකර මහතා අප සමග කිය.