ටොයෝටා ප්‍රීමියෝ, ඇලියන් සහ හොන්ඩා වෙසල් මෝටර් රථවල මිල නොවැම්බර් 1 වැනිදා සිට ඉහළ ගොස් ඇතැයි වාහන ආනයනකරුවන්ගේ සංගමයේ සභාපති දිනේෂ් සේනානායක පවසයි.

ඒ අනුව එම රථ රුපියල් දෙලක්ෂ විසි දහසේ සිට ලක්ෂ හතර දක්වා වැඩිවී ඇති බවත් ඊට හේතුව ඒවායෙහි තීරු බදු වටිනාකම ඉහළ යාම බවද ඔහු කියයි.

ටොයෝටා ප්‍රීමියෝ මෝටර් රථයේ නව තීරු බද්ද රුපියල් 3,84,027ක් බව ද ඇලියන් රථයක් සඳහා 3,62570 ක තීරු බද්දක් ද හොන්ඩා වෙසල් රථයකට රුපියල් 2,20,222ක තීරු බද්දක් ද ගෙවීමට සිදුව ඇතැයි ඔහු සඳහන් කරයි.

රේගු මාධ්‍ය ප්‍රකාශක ධර්මසේන කහඳව මහතා සඳහන් කළේ වාහනයේ තක්සේරු වටිනාකම රේගුව විසින් ඉහළ දමා නැති බවත් එම වාහන නිෂ්පාදන ආයතන ඒවායේ පහසුකම් වැඩිකර 2017 නවීකරණය කළ වාහන සඳහා මිල වැඩි කර ඇති බවයි. ඒ අනුව ඒවායේ නව මිල එම ආයතනවල වෙබ් අඩවිවල සඳහන්ව ඇති බවත් ඒ අනුව ශ්‍රී ලංකා රේගුව එම වාහනවල නව වටිනාකම් අනුව මෙම මිල වැඩිකිරීම සිදු කර ඇති බවත්ය.

මෙය හදිසියේ ගත් තීරණයක් නොවන බවත් රජය පසුගියදා ඉදිරිපත් කළ ගැසට් නිවේදනයක් මගින් මෙම මිල වැඩිවීම සිදුකළ බවත් කහඳව මහතා කියයි.