දෙවැනි හරස් වීදියේ නිව් සිටි පොයින්ට්හි ව්‍යාපාරික
මොහොමට් ෆාස්කාන්

ලංකාවේ පමණක් නොව ලෝකයේ කොහේවත් නැති අඩු ගාණට නිවසකට සරිලන ඕනෑම භාණ්ඩයක් කොටුවෙන් ලබාගත හැකිය යන්න බොහෝ දෙනාගේ අදහසයි. එහි වැරැද්දක් නැත. බොහෝ භාණ්ඩ ඉතා අඩු මිල ගණන් යටතේ පිටකොටුවෙන් ලබා ගත හැකිය. මේ දිනවල වෙළෙදාමේ තතු දැනගැනීමට අපි දෙවැනි හරස් වීදිය වෙත ගියෙමු. දෙවැනි හරස් වීදිය හාලිමාර් වීදිය නමින් ද අතීතයේ හඳුන්වා ඇත. දෙවැනි හරස් වීදියට යන්නෝ රෙදි සොයන්නෝ ය. එපමණක් නොවේ. සුවඳ විලවුන්, රූපලාවණ්‍ය උපකරණ, මැහුම් උපකරණ සොයන්නට ද සමහරු දෙවැනි හරස් වීදියට යති. දෙවැනි හරස් වීදියේ නිව් සිටි පොයින්ට් වෙළෙදසැලෙහි අලෙවිකරුවකු වූ මොහොමට් ෆාස්කාන් මහතා මේ දිනවල බිස්නස් පිළිබඳව දැක්වූයේ මෙවැනි අදහසකි. 

Q: මේ දිනවල බිස්නස් කොහොමද?
අපි ළඟ තියෙන්නේ මංගල උත්සව ඇඳුම්. ලෙහෙන්ගා සලවාර් තමයි වැඩියෙන් තියෙන්නේ. ඒ ඇඳුම් අපි ආනයනය කරන ඒවා. අපි තොග සිල්ලර දෙකම කරනවා. සේවකයෝ 15 ක් වගේ සේවය කරනවා. මේ දවස්වල බිස්නස් ගැන කියනවා නම් බිස්නස් හොඳයි වරදක් නෑ. කලින් අවුරුදුවල වගේම බිස්නස් තියනවා. ගිය අවුරුද්දට සාපේක්ෂව බැලු‍වාම නම් ගිය අවුරුද්දට වඩා මේ අවුරුද්දේ බිස්නස් වැඩියි.

Q: බිස්නස් හොඳ වීමට බල පෑ හේතු මොනවාද?
රාමසාන් උත්සවය සහ සිංහල අලු‍ත් අවුරුදු උත්සවය නිසා මේ කාලේ කොයි කාගේත් බිස්නස් වැඩියි. මිනිස්සු කියන තරම් බිස්නස් අඩුවක් නෑ. රාමසාන් නිසා අපෙත් බිස්නස් වැඩි වෙලා තියෙන්නේ. මොකද සල්වාර් එහෙම වැඩිපුර වෙළෙදාම් වෙනවා. එහෙත් අපිට සීසන් එකක් කියලා නෑ හැමදාම බිසනස් තියනවා. ඒකට හේතුව තමයි අපි සුළු ලාබ තියාගෙන ඇඳුම් සහනාදායි මිලට විකුණන නිසා. අනිත් දේ තමයි ඇඳුම් බිස්නස් කරද්දි විශේෂයෙන්ම කාන්තා ඇඳුම් බිස්නස්වලදී තෝරාගැනීමට ලොකු එකතුවක් තියෙන්නෙ ඕන. මොකද කාන්තාවන් ඇඳුමක් ගන්න ගියාම තෝරලා බලලා ගන්න කැමැතියි. අපි ළඟ ලොකු ඇඳුම් එකතුවක් තියන නිසා අපිට පාරිභෝගිකයෝ වැඩියි. ඉන්දියාවෙන්, සිංගප්පූරුවෙන් වගේම චීනෙන් තමයි ඇඳුම් ආනයනය කරන්නේ. ඒ නිසා විවිධ පාටවලින් ඩිසයින්වලින් විවිධ මිල ගණන් යටතේ ඇඳුම් අපි ළග තියනවා. ඒ නිසා හැමදාම අපිට හොඳට බිස්නස් තියනවා. 

ශෂිකා අබේරත්න
ඡායාරූප- ලහිරු හර්ෂණ