බොරැල්ල වසන්තා ලේඩිස් සෙන්ටර් හිමිකරු වසන්ති අතුකෝරළ

මේ දිනවල බිස්නස්වල තත්වය පිළිබඳව සොයා බැලීමට අපි පිටකොටුව, නුගේගොඩ, මහරගම, කොහුවල, දෙහිවල ආදී ප්‍රදේශයන් වෙත ගියෙමු. බිස්නස්වල තතු සෙවීමට අප මෙවර ළඟා වූයේ බොරැල්ල නගරයටය. බොරැල්ල නගර මධ්‍යයේ පිහිටි කාන්තා ඇඳුම් අලෙවිසැලක් වූ වසන්තා ලේඩිස් සෙන්ටර් වෙත අපි ගොඩ වූයෙමු. එහි හිමිකරු වූ වසන්ති අතුකෝරළ මහත්මිය මේ දිනවල බිස්නස් පිළිබඳ දැක්වූයේ මෙවැනි අදහසකි.

Q: මේ දිනවල බිස්නස් කොහොමද?
මම බිස්නස් කරන්න පටන් අරන් අවුරුදු 28 ක්. මම විකුණන්නේ කාන්තා ඇඳුම් පැළදුම්. පිටකොවුව, මහරගම පමුණුව ආදී තොග වෙළෙඳපොළවලින් රෙදි ගෙනවිත් තමයි බිස්නස් කරන්නේ. මේ දිනවල බිස්නස් ගැන කියනවා නම් බිස්නස් අන්තිම සවුත්තුයි. බිස්නස් ඇත්තෙම නෑ. අප්‍රේල් මාසේ එහෙම සීසන් එක වුණාට ඒ දවස්වලත් හරියට බිස්නස් එකක් තිබ්බෙ නෑ. දැන් කොහොමත්ම නෑ.

Q: බිස්නස් අඩුවීමට බල පෑ හේතු මොනවාද?
බිස්නස් අඩු වෙන්න හේතු කීපයක්ම බලපානවා. එකක් තමයි මිනිසුන්ට සල්ලි නෑ. අවුරුදු කාලේ එහෙම වියදම් වැඩි නිසා මේ වෙද්දි මිනිසුන්ගේ අතේ සල්ලි නෑ. ඒ නිසා අත්‍යාවශ්‍ය දේවල් මිලදී ගන්න්වා ඇරෙන්න රෙදිපිළි වගේ දේවල් වලට වියදම් කරන්නේ නෑ. අනිත් හේතුව තමයි රෙදි මිල වැඩිවීමත් බිස්නස් අඩු වෙන්න බලපානවා. 

අපි තොග කඩවලින් ගෙනල්ලා අපිටත් ලාබයක් තියාගෙනනේ විකුණන්නේ. තවත් හේතුවක් තමයි නමගිය ලොකු ලොකු රෙදි කඩවල් නිසා අපි වගේ පොඩි වෙළඳුන්ට බිස්නස් අඩු වෙනවා. ගොඩක් පාරිභෝගිකයෝ ලොකු කඩවල්වලට තමයි යන්නේ. ඉස්සර අපි හැමදේම කරගත්තේ මේ කඩෙන් එන ආදායමෙන්. දැන් එහෙම වියදම් කරන්න තරම් බිස්නස් එකක් නෑ. මගේ කඩේ එහා පැත්තේ තිබ්බ කඩවල් දෙකම දැන් වහලා. ඉස්සර හොඳට බිස්නස් කරපු කඩවල්. දැන් බිස්නස් අඩු නිසා කඩ වහලා අයින් කරගෙන. දැන් ඒ කඩ කාමර අතුගාන්නවත් කෙනෙක් නෑ ජරාවාස වෙලා තියෙන්නේ. ඕක තමයි අද බිස්නස්වල තත්වය.

ශෂිකා අබේරත්න
ඡායාරූප - ඉසුරු පෙරේරා