අද ගනුදෙනුවල දී කොළඹ කොටස් වෙළෙදපොළ දර්ශක නැවත වාරයක් ශක්තිමත්වීමට උත්සාහ කරනු ඇත. ඉකුත් සිකුරාදා (ජුනි 06) ගනුදෙනු තියුණු රටාවකට අවතීර්ණ වී තිබුණ අතර අවසන් පැය දෙක තුළ විකිණීමේ ප්‍රවණතාවක් සනිටුහන් කෙරිණ. එහි ප්‍රතිළුලයක් වශයෙන් දර්ශක සුළු වශයෙන් පහත වැටුණි. 
ගනුදෙනු අවසානයේ දී සියලු කොටස් මිල දර්ශකය ඒකක 17,394.54 ක් වු අතර එය කලින් දිනයට සාපේක්ෂව දර්ශක 40.49 ක පසුබැසීමකි. එස් ඇන්ඩී පී ශ්‍රී ලංකා දර්ශකය 5,175.95 ක් වශයෙන් අවසන් වූ අතර එය දර්ශක 10.83 අඩුවීම ක් සේ දැක්විය හැකිය. මෙදින ගනුදෙනු 32,250 ක් වාර්තා වූ අතර සමාගම් 123 ක කොටස් මිල ඉහළ ගියේය. කොටස් මිල පහත වැටුණ සමාගම් ගණන 125 කි. දෛනික පිරිවැටුම රුපියල් මිලියන 4,220.77 ක් විය. කොටස් මිලියන 189.2 ක් හුවමාරු වූ බව දැක්වේ. 
ලංකා හොස්පිටල් රුපියල් 1.50ක ලාභාංශ ප්‍රකාශයට පත් කර ඇති අතර ටී. ජේ. ලංකා රුපියල් 1.60 ක, ඇලයන්ස් ෆිනෑන්ස් රුපියල් 9.60 ක සහ විදුල්ලංකා ශත තිස්පහක් වශයෙන් ද ලාභාංශ නිවේදනය කර තිබේ. විදේශ සහභාගීත්වය සලකා බලන පසු පසුගිය සතිය හා සමාන තත්වයක් ඉදිරි දිනවල ද අපේක්ෂා කළ හැකිය. ඉකුත් (06) ගනුදෙනුවල දී විදේශ ආයෝජකයන් රුපියල් මිලියන 115.6 ක කොටස් මිල දී ගත් අතර විකිණීම් රුපියල්මිලියන 171.8 කි. රටට සිදුවූ ශුද්ධ අවාසිය රුපියල් මිලියන 56.2 කි.
ලංකා මිල්ක් ෆුඞ් රුපියල් මිලියන 204 ක්, ජෝන් කීල්ස් රුපියල් මිලියන 194 ක්, පෑන් ඒෂියා රුපියල් මිලියන 141 ක්, පීපල්ස් ලීසිං රුපියල් මිලියන 121 ක්, ඩිප් ප්‍රඩක්ට් රුපියල් මිලියන 109 ක් පෑන් ඒෂියා පවර් රුපියල් මිලියන 107 ක්, හේලීස් පැබ්රික් රුපියල් මිලියන 101 ක්, හේමාස් හෝල්ඩිං රුපියල් මිලියන 100 ක්, ලංකා ඇලුමිනියම් රුපියල් මිලියන 96 ක්, එල්.වී.එල්. එන්ජි ෆන්ඩ් රුපියල් මිලියන 91 ක්, බ්‍රවුන්ස් රුපියල් මිලියන 87 ක්, සම්පත් බැංකුව රුපියල් මිලියන 87 ක්, සහ වැලිබල් වන් රුපියල් මිලියන 83 ක්, වශයෙන් පිරිවැටුමට වැඩිම දායකත්වයක් දැක්වූ අවස්ථා දැක්විය හැකිය.
නිරීක්ෂක