මෙම වසරේ මාර්තු මාසය ඇතුළත පමණක් කොළඹ කොටස් වෙළෙඳාමේ දී සියලු කොටස් මිල දර්ශකය ඒකක 664 කින් පිරිහී ගිය අතර මිලංකා දර්ශකය ඒකක 198 කින් අඩු වී ඇති බව වාර්තා පෙන්වයි. මෙකී කාලය තුළ දී පැවැති අඩු උනන්දුව හේතු කරගෙන කොටස් විකිණීමක් ලෙස සටහන් වූ අතර වෙළෙඳපොළ ප්‍රාග්ධනීකරණය රුපියල් මිලියන දෙසිය හයකින් අඩු වී තිබේ. ගනුදෙනු පැවැති දින දහනවයක කාලය තුළ රු. මිලියන දෙසිය හයක් ඉවත්වීම සැලකිය යුතු පසුබෑමක් වශයෙන් දැක්විය හැකිය. කෙසේ වෙතත් මෙම දත්ත පදනම් කරගෙන තෝරාගත් කොටස් මිල දී ගැනීමට අවස්ථාවක් නිර්මාණය වී තිබේ.

මාර්තු මාසය පුරා බැංකු හා මූල්‍ය අංශයේ කොටස් සඳහා කැපී පෙනෙන ඉල්ලුමක් තිබුණි. ප්‍රවාහන, සන්නිවේදන සහ ආහාරපාන හා දුම්කොළ අංශවල කොටස් සැලකිය යුතු ප්‍රමාණයකින් හුවමාරු විය. හේමාස් කොටස් වෙන් කිරීමක් ප්‍රකාශයට පත් කර තිබේ. සම්පත් බැංකුව බිලියන දහයක ණයකර නිකුතුවක් ප්‍රකාශයට පත්කර ඇති අතර එය සඳහා සියයට 11.75 ක වාර්ෂික ප්‍රතිලාභ හිමිවේ. ලංකා බැංකුව ද තවත් රුපියල් බිලියන දහයක කොටස් ණයකරයක් නිකුත් කරන අතර එය ඉල්ලුම අනුව අතිරේකව තවත් රුපියල් මිලියන 50 ක් දීර්ඝ කරනු ඇත. 2025 මූල්‍ය වසර සඳහා රජය අලුතින් පනවන ලද හා සංශෝධිත බදු අද සිට බලපැවැත්වේ. මෙහි බලපෑම වෙළෙඳපොළ ගනුදෙනු කෙරෙහි කෙබඳු පීඩනයක් ඇතිකරන්නේ ද යන්න මෙම සතිය තුළ ආයෝජකයන්ගේ හැසිරීම අනාවරණය කරනු ඇත.

මේ අතර ඉකුත් සිකුරාදා (මාර්තු 28) ගනුදෙනු අවසන් වන උච්ඡාවචන අවසානයේ දී තරමක පසුබෑමක් සහිතව දිනයේ ගනුදෙනු අවසන් විය. සියලු කොටස් මිල දර්ශකය ඒකක 15,814.82 තෙක් පහළ ගිය අතර එය කලින් දිනයට සාපේක්ෂව දර්ශක 67.24 ක අඩුවීමකි. එස් ඇන්ඩී පී ශ්‍රී ලංකා දර්ශකය 4,723.72 ක් වශයෙන් අවසන් වූ අතර එය දර්ශක 25.14 ක පසුබැසීමක් සේ දැක්විය හැකිය. මෙදින විදේශ මිල දී ගැනීම් රුපියල් මිලියන 170 කි. විකිණීම් රු.මිලියන 258 ක් විය. ශුද්ධ අවාසිය රු. මිලියන 48 කි.

නිරීක්ෂක