කොටස් වෙළෙඳපොළ ගනුදෙනු අද දිනයේ සිදු නොවේ. මහ ශිව රාත්‍රී දිනය හේතු කොටගෙන නිවාඩු දිනයක් වශයෙන් ප්‍රකාශයට පත් කර ඇත. ඉකුත් දින කිහිපය තුළ එපමණ උණුසුමකින් තොරව පැවැති ගනුදෙනු ඊයේ (පෙබ. 25) අවසන් කරන පසු සියලු කොටස් මිල දර්ශකය ඒකක 16345ක් දක්වා පහළ ගියේය. එස් ඇන්ඩී පී ශ්‍රී ලංකා දර්ශකය 4897 ක් වශයෙන් අවසන් විය.

ජාත්‍යන්තර තත්වය සලකන පසු චීනය හැරුණු කොට ලෝකයේ සෑම රටකම පාහේ කොටස් වෙළෙඳාම තරමක පසුබෑමක පවතී. ඇමරිකාවේ ජනාධිපතිවරයා වශයෙන් පත්වීමෙන් පසු ඩොනල්ඩ් ට්‍රම්ප් කරන ප්‍රකාශ ආයෝජකයන්ගේ විස්මයට හේතු වී ඇත. මෑත භාගය තුළ පිබිදීමක් තිබුණ කොටස් වෙළෙඳපොළ ගණනාවක අවිනිශ්චිත තත්වය පවතින බව පසුගිය සතියේ ජාත්‍යන්තර මාධ්‍ය වාර්තා කළේය. ට්‍රම්ප් ජනාධිපතිවරයා ආර්ථිකය කළඹවන අතර එහි වාසිය හේතුකොටගෙන ඇමරිකාව යළිත් ඉහළට ඔසවා තබන්නට වෑයම් කරමින් සිටී. ඔහුගේ තීරණ ගැනීමේ ක්‍රියාවලිය තුළ පැවැතිය හැකි අවදානම ගැනීමට ආයෝජකයෝ සූදානම් නැත.

ඉන්දියානු, ජපාන කොටස් වෙළෙඳපොළවල සංචිත විකුණා චීනයේ ආයෝජනය කිරීමට පසුගිය කාලයේ තිබුණ ප්‍රවණතාව තරමක සසලවීමකට පත්ව ඇති අතර ඇමරිකානු මූල්‍ය ප්‍රතිපත්ති ඉදිරියේ විදේශ ගනුදෙනුකරුවන් තරමක නිහැඬියාවක පසුවන බව දැක්වේ. 2024 වසර අවසන්වන විට ඉන්දියානු කොටස් වෙළෙඳපොළෙන් පමණක් ඇමරිකානු ඩොලර් ට්‍රිලියනක මුදලක් විදේශ ආයෝජකයෝ ඉවත් කරගෙන තිබේ. ජපානයේ නිකිණි සියයට 1.5 කින්, ඉන්දියාව සියයට 4 කින්, හොංකොං සියයට 18 කින් පමණ ආසියානු වෙළෙඳපොළ වශයෙන් පසුබෑමකට පත්ව ඇත. කොළඹ කොටස් වෙළෙඳපොළ ආයෝජන පවා පසුගිය සති හතරකට වැඩි කාලය තුළ ශුද්ධ ඉවත්කරගැනීම් වශයෙන් සටහන්ව තිබේ. 

නිරීක්ෂක