භානුක අමරසිංහ

කොළඹ කොටස් හුවමාරුවේ දර්ශක අගයක් ඊයේ දිනයේදී දරුණු කඩා වැටීමක් පෙන්නුම් කළේය. එහිදී ස්ටෑන්ඩර්ඩ් ඇන්ඩ් පුවර්ස් ශ්‍රීලංකා 20 දර්ශකය පෙර දිනයට සාපේක්ෂව සියයට 5කින් පහත වැටීමත් සමගින්ම කොළඹ කොටස් හුවමාරුවේ ගනුදෙනු විනාඩි 16කට අත්හිටුවීමටද සිදු විය. ඒ අනුව ඊයේ පෙරවරු 9.51 සිට 10.07 දක්වා ගනුදෙනු අත්හිටුවූ අතර, ඉන්පසුව තවත් විනාඩි 14ක කාලයක් පැවැති වෙන්දේසි කාලයකින් අනතුරුව යළිත් ගනුදෙනු ආරම්භ වූයේ පෙරවරු 10.21 ටය.

මේ අතර, දිනයේ ගනුදෙනු අවසානයේ දී සියලු‍ කොටස් මිල දර්ශකය ((ASPI) ඒකක 14,660.45ක් ලෙස සටහන්ව තිබූ අතර, එය පෙර දිනය හා සැසඳීමේදී ඒකක 712.90කින් එනම් සියයට 4.64ක පහළ බැසීමක් විය. එසේම ස්ටෑන්ඩර්ඩ් ඇන්ඩ් පුවර්ස් ශ්‍රීලංකා 20 මිල දර්ශකය ඒකක 4,264.84ක් දක්වා ඒකක 268.51කින්, එනම් සියයට 5.92කින් පහළ බැස තිබුණි.

දිනය තුළදී සමාගම් 205 ක කොටස් මිල පෙර දිනයට සාපේක්ෂව පහළ ගොස් තිබුණු අතර, සමාගම් 15ක පමණක් කොටස් මිල සුළු ඉහළ යාමක් දක්නට ලැබුණි. විශේෂයෙන්ම එක්සත් ජනපද ජනාධිපති ට්‍රම්ප් විසින් ශ්‍රී ලංකාව වෙත පනවන ලද සියයට 88ක තීරු බදු හේතුවෙන් හටගත් කම්පනය නිසා ඇතිවූ ආයෝජක අස්ථාවරත්වය මෙම කඩා වැටීමට හේතුව බව විශ්ලේෂකයෝ පවසති. කෙසේ වෙතත් ඊයේ දිනයේදී කොළඹ කොටස් හුවමාරුව තුළ කොටස් 188,300,651ක් ගනුදෙනු වී තිබූ අතර, එහි පිරිවැටුම ලෙස රු. බිලියන 6.47ක් සටහන් විය.