භානුක අමරසිංහ

ඇමෙරිකාව මෙරටින් කරන ආනයන සඳහා පැනවූ තීරු බදු සම්බන්ධයෙන් ලබා දී ඇති දින 90ක විරාමයෙන් අනතුරුව මෙරට අපනයන කර්මාන්තය සුරක්ෂිත කිරීම සදහා විකල්ප සෙවීම සම්බන්ධයෙන් ශ්‍රී ලංකා ආයෝජන මණ්ඩලය මෙරට අපනයනකරුවන් සමගින් ඊයේ සාකච්ඡාවක් පැවැත් වූ බව පවසයි. 
මෙහිදී ඇමරිකානු වෙළෙදපොළ වෙත අපනයනය කරන අපනයනකරුවන් පනස් දෙනාට මෙම සාකච්ඡාවට ආරාධනා කෙරී තිබේ. ආයෝජන මණ්ඩලයේ සභාපති අර්ජුන හේරත් මහතාගේ ප්‍රධානත්වයෙන් මෙම සාකච්ඡාව පවත්වා ඇකි අතර, ජනාධිපති ජ්‍යෙෂ්ඨ උපදේශක දුමින්ද හුලංගමුව මහතාද ඊට සම්බන්ධ වී තිබේ.  මෙහිදී අදහස් දක්වා ඇති ඒ මහතා, ගැටලු‍ව පිළිබඳව රාජ්‍යතාන්ත්‍රික මට්ටමේ සාකච්ඡා සිදුකර බවත්, වොෂිංටන් ඩීසීහි මෙරට රාජ්‍ය තාන්ත්‍රික නිලධාරීන් ධවල මන්දිරයේ වෙළෙඳ දෙපාර්තමේන්තුවේ අදාළ වෙළෙඳ නියෝජිතයන් සමග සාකච්ඡා ආරම්භ කර ඇතැයිද පවසා තිබේ.
එම මණ්ඩලය සඳහන් කරන ආකාරයට මෙම විරාමය අපනයන ක්ෂේත්‍රය වෙත ධනාත්මක බලපෑමක් කර ඇති අතර බොහෝ ගනුදෙනුකරුවන්ගේ ඇණවුම් නැවත ආරම්භ කර ඇත.  එක්සත් ජනපදයට භාණ්ඩ අපනයනය කරන ශ්‍රී ලාංකික ව්‍යාපාරවල විවිධ පරාසයක පවතින අතර ඉන් ආයෝජකයන් 200ක් පමණ ආයෝජන මණ්ඩල ව්‍යවසාය වේ.