භානුක අමරසිංහ 

මෙරට ජනප්‍රිය ජංගම දුරකතන ඇප් පාදක ප්‍රවාහන සේවා සම්පාදන වේදිකාවක් වන PickMe අයත්Digital Mobility Solutions Lanka PLC සමූහය 2024/25 මූල්‍ය වර්ෂයේ පළමු මාස නවය තුළදී රු. බිලියන 4.1ක ආදායමක් හිමි කරගැනීමට සමත්ව ඇතැයි පවසයි. මෙය පෙර මූල්‍ය වර්ෂයේ එම කාලසීමාවේදී හිමි කරගත් රුපියල් බිලියන 2.8ක ආදායම හා සැසඳීමේදී සියයට 47ක ඉහළ යාමකි. 

මෙහිදී සිය ඇප් වැඩසටහන භාවිත කරන අවස්ථා සංඛ්‍යාව මෙන්ම එහි පරිශීලකයන් සංඛ්‍යාව කැපී පෙනෙන ලෙස ඉහළ යාම ඊට හේතුව වූ බවDigital Mobility Solutions Lanka PLC  සමාගම සඳහන් කරයි. 
මේ අතර එම සමාගම විසින් 2024/25 මූල්‍ය වර්ෂයේ පළමු මාස නවයක කාලය සඳහා හිමි කරගෙන ඇති ශුද්ධ ලාභය රුපියල් මිලියන 795 කි. එය පෙර මූල්‍ය වර්ෂයේ එම කාලසීමාවේදී හිමි කරගත් රුපියල් මිලියන 472ක ශුද්ධ ලාභය හා සැසඳීමේදී සියයට 69ක ඉහළ යාමකි. 

මේ අතර 2024/25 මූල්‍ය වර්ෂයේ තෙවැනි කාර්තුව සඳහා එම සමූහයේ ආදායම රුපියල් බිලියන 1.5කි. එය පෙර වසරේ එම කාලයේදී හිමි වූ රුපියල් බිලියන 1.1ක ආදායම හා සැසඳීමේදී සියයට 41ක ඉහළ යාමකි. විශේෂයෙන්ම මෙම කාර්තුවේදී එතෙක් මෙතෙක් වාර්තා වූ ඉහළම දෛනික ක්‍රියාකාරකම් සටහන්ව ඇතැයිද එය 2024/25 දෙවැනි කාර්තුව හා සැසඳීමේදී සියයට 9ක ඉහළ යාමක් බවත් සමාගම පවසයි. 
එසේමDigital Mobility Solutions Lanka PLC  සමාගම 2024/25 මූල්‍ය වර්ෂයේ කාර්තුවක් තුළ රැස් කරගත් වැඩිම මෙහෙයුම් ලාභයද තෙවැනි කාර්තුවේදී රැස් කරගෙන තිබේ. එය රුපියල් මිලියන 396කි.