DFCC බැංකුව විදේශ රැකියාවල නියුතු ශ්‍රී ලාංකිකයන් වෙනුවෙන් ‘DFCC රටවිරු’ නමින් විශේෂ ගිණුමක් හඳුන්වා දී තිබේ. විදේශ මුදල් ප්‍රේෂණ ඉලක්ක කරගත් ඉතුරුම් ගිණුමක් වන මෙහි මූලික අරමුණ වන්නේ විදේශ රැකියා නියුක්තිකයන්ට මෙන්ම ඔවුන්ගේ පවුල්වලටද අත්වැලක් වීමය. සිය ගනුදෙනුකරුවන්ගේ අවශ්‍යතාවලට ගැළපෙන, පහසුවෙන් භාවිත කළ හැකි බැංකු සේවා හඳුන්වා දීම සඳහා DFCC බැංකුව දරන නිරන්තර උත්සාහයේ තවත් ප්‍රතිඵලයක් වශයෙන් මෙම ගිණුම හඳුන්වා දෙන ලදි. 
‘DFCC රටවිරු’ ගිණුම් හිමියන්ට වාර්ෂිකව සියයට 5 ක තරගකාරී පොලී අනුපාතයක් මෙන්ම, විදේශ රැකියා නියුක්තිකයන් සහ ඔවුන්ගේ පවුල්වල සාමාජික සාමාජිකාවන් වෙනුවෙන්ම හඳුන්වා දී ඇති තවත් ප්‍රතිලාභ රාශියක්ද හිමි වේ. මෙම ප්‍රතිලාභ අතරට නොමිලේ හිමි වන ඩෙබිට් කාඩ්පතක්, ණය හා වෙනත් තෝරාගත් බැංකු සේවා සඳහා විශේෂ පොලී අනුපාත සහ ප්‍රමුඛතා බැංකු සේවා සහය ඇතුළු ප්‍රතිලාභ රැසක් ඇතුළත්ය. එමෙන්ම ගිණුම් හිමියන්ගේ පවුල්වල සාමාජිකයන් (ශ්‍රී ලංකාවේ වෙසෙන) වෙනුවෙන් සුවිශේෂ සහන පැකේජයක් යටතේ හිමි වන රෝහල්ගත කිරීම් රක්ෂණාවරණයක්ද මීට ඇතුළත් කර තිබේ. 
“DFCC රටවිරු ගිණුම යනු එතෙර සිට මෙතෙරට මුදල් එවමින් තම ආදරණීයයන්ට අත්වැලක් වන අතරම රටේ ආර්ථිකයට සුවිශාල දායකත්වයක් ලබා දෙන විදේශ රැකියා නියුක්තිකයන්ගේ මෙහෙවර ඇගයීම සඳහා හඳුන්වා දුන් සුවිශේෂ ගිණුමක්. එය හුදෙක් ඉතිරි කිරීමෙන් ඔබ්බට ගිය, මූල්‍ය යහපැවැත්ම, සරලත්වය සහ සහයෝගය මූලික කරගත් ගිණුමක් ලෙස හැඳින්විය හැකියි. අනවශ්‍ය සංකීර්ණතා ඉවත් කරමින්, ගිණුම් හිමියන්ට තම ගිණුම්වලට පහසුවෙන් පිවිසෙමින් තම මුදල් හොඳින් කළමනාකරණය කරගැනීමටත්, අර්ථවත් ලෙස භාවිත කිරීමටත් මෙමගින් අවස්ථාව සැලසෙනවා. මෙය හුදෙක් බැංකු සේවාවක් පමණක් නොවෙයි. මෙය අපගේ ගිණුම් හිමියන් ලොව කොහේ සිටියත් ඔවුන්ට අත්වැලක් වීම සඳහා අප ලබා දී ඇති ප්‍රතිඥාවේ ප්‍රතිඵලයක්.” DFCC බැංකුවේ ජ්‍යෙෂ්ඨ උප සභාපති (ජාත්‍යන්තර බැංකු සේවා, ප්‍රේෂණ සහ ව්‍යාපාර සංවර්ධන) ඇන්ටන් ආරුමුගම් මහතා  පැවසීය. 
‘DFCC රටවිරු’ ගිණුම් හිමියන්ට DFCC Online සහ DFCC ONE වැනි ඩිජිටල් මාධ්‍ය ඔස්සේ ඕනෑම වේලාවක ඕනෑම ස්ථානයක සිට සුරක්ෂිත ලෙස තම ගිණුමට පිවිසී ගිණුමකින් ගිණුමකට මුදල් මාරු කිරීම, බිල්පත් ගෙවීම සහ තම මූල්‍ය කටයුතු කළමනාකරණය කිරීම කළ හැකි වේ. ඉතාමත් පහසු ක්‍රියාවලියක් ඔස්සේ ‘DFCC රටවිරු’ ගිණුමක් විවෘත කළ හැකි අතර, විදෙස්ගතව සිටින ගනුදෙනුකරුවන්ට අවශ්‍ය සහය කඩිනමින් ලබාදීම සඳහා DFCC බැංකුවේ පාරිභෝගික සේවාව සූදානමින් සිටී.