වෙනත් මූල්‍ය සේවා’ කාණ්ඩයේ ජය හිමිකරගනී

CDB  සමාගම පසුගියදා පැවති ‘ACCA Sri Lanka Sustainability Reporting Awards’  හිදී ‘වෙනත් මූල්‍ය සේවා’ කාණ්ඩයේ ජයග්‍රහණය හිමිකර ගැනීමට සමත් විය. වරලත් සහතිකලත් ගණකාධිකාරී සංගමය  (ACCA)  විසින් වාර්ෂිකව සංවිධානය කරනු ලබන මෙම සම්මාන උළෙල මෙවර පැවැත්වුණේ 20 වැනි වරටය. මෙය ජනතාවගේ, ලෝකයේ සහ ව්‍යාපාරකරණයේ යහපත ඔස්සේ වගවීම, විනිවිදභාවය සහ වගකීම්සහගත බව යන ගුණාංග වෙනුවෙන් දිගින් දිගටම කැපවීම උදෙසා ලැබුණු සුවිශේෂී ඇගයුමක් ලෙස හැඳින්විය හැකි බව CDB සමාගම සඳහන් කරයි. 

ලොවම ආවරණය කරමින් පවත්වනු ලබන මෙම සම්මාන වැඩසටහන යටතේ, පාරිසරික හා සමාජයීය බලපෑම් ඇතුළුව සියලු‍ම තිරසාරත්ව තොරතුරු පූර්ණ වශයෙන් අනාවරණය කරන, ආයතනික විනිවිදභාවය සම්බන්ධයෙන් දැනුවත් කිරීම් සිදුකරන සහ තම පාර්ශ්වකරුවන්ට ප්‍රතිචාර දැක්වීම සම්බන්ධයෙන් වැඩි වගකීමක් දරන සමාගම් හා ආයතන විශේෂයෙන් ඇගයීමට ලක් වේ. 

මෙම සම්මාන උළෙලේ විනිශ්චය මණ්ඩලයේ සභාපති ලෙස Amrita School of Sustainable Futures  හි Adjunct Professor  තනතුර දරන සන්තෝෂ් ජයරාම් මහතා කටයුතු කළේය. එම විනිශ්චය මණ්ඩලය විසින් නිකුත් කරන ලද වාර්තාවෙහි දැක්වෙන්නේ, වසර 10 ක කාලසීමාවක් සඳහා තාක්‍ෂණික පරිවර්තනය සහ තිරසාරත්වය මූලික කරගත් ක්‍රමෝපායක් අනාවරණය කිරීම සම්බන්ධයෙන්  CDB  වාර්තාව කැපීපෙනුණු බවයි. එහි දැක්වෙන ආකාරයට “එය ( CDB වාර්තාව) සැලකිය යුතු දුරකට සාම්ප්‍රදායික කර්මාන්තයක් තුළ ඒකාබද්ධ චින්තනයක් පෙන්නුම් කරන අතර, එහි ඉදිරිපත් කර ඇති කරුණු සනාථ කර ඇත. දරුවන්ගේ සෞඛ්‍යය හා යහපැවැත්ම වෙනුවෙන් සහ ඔටිසම් තත්වය සම්බන්ධයෙන් එහි දීර්ඝකාලීන කැපවීම ප්‍රශංසනීය වේ.”

සම්මාන වැඩසටහනේ විනිශ්චය ක්‍රියාපටිපාටිය යටතේ සමාගම් හා ආයතනවල ක්‍රමෝපාය, ආයතනික පාලනය, අවදානම් කළමනාකරණය, ප්‍රමිතික සහ ඉලක්ක මෙන්ම සමස්තයක් ලෙස වාර්තාව ඉදිරිපත් කිරීමේදී පෙන්නුම් කරන ලද සාධාරණ බව, වාස්තවිකත්වය, වාර්තාකරණ ආයතනය සහ සම්බන්ධතා තොරතුරු ආදියද සැලකිල්ලට ගෙන තිබේ.