ළඟ ළඟම එන උත්සව සමයත් සමඟ කොළඹ කොටුවේ ව්‍යාපාරිකයන්ගේ සූදානම කෙසේද යන්නත් මේ දිනවල ඔවුන්ගේ වෙළෙඳාමේ තත්වය සොයා බැලීමට ගිය ගමනේ දී අපි ගොඩවැදුනේ පීපල්ස් පාර්ක් සංකීර්ණයේ අමරා ට්‍රේඩර්ස් (AMARA TRADERS ) වෙළෙඳ ආයතනය වෙතය. අපි වෙළෙඳපොළට ගොඩවන අවස්ථාවේ ආයතනයේ සිටි පිරිස එක්ව බිස්නස් සම්බන්ධයෙන් කතා බහ කරමින් සිටිය ද අනෙකුත් වීදිවල මෙන් කඩිමුඩියේ බිස්නස් එකක් කරගැනීමට පොරකන දසුනක් දක්නට ලැබුණේ නැත.

එහිදී පීපල්ස් පාර්ක් සංකීර්ණයේ අමරා ට්‍රේඩර්ස් වෙළෙඳ ආයතනයේ හිමිකරුවන ගෝපාල් ජීවරන් මහතා මේ දවස්වල බිස්නස් සම්බන්ධයෙන් දැක්වූයේ මෙවන් අදහසකි.

පාසල් ළමයින් සඳහා අවශ්‍ය කරන විවිධ මාදිලියේ පාසල් උපකරණ තමයි අපි අලෙවි කරන්නේ. මේ වසරේ මුල් කාල සීමාවේ යම් මට්ටකට බිස්නස් තිබුණා. එහෙත් මේ දවස්වල බිස්නස් සියයට 50කින් අඩුවෙලා තියෙන්නේ. ගිය වසරට වඩා මේ වසරේ බිස්නස් අඩුයි.

පීපල්ස් පාර්ක් සංකීර්ණයේ අමරා ට්‍රේඩර්ස් හිමිකරු

ගෝපාල් ජීවරන්

Q මේ දිනවල බිස්නස් කොහොමද?

පාසල් ළමයින් සඳහා අවශ්‍ය කරන විවිධ මාදිලියේ පාසල් උපකරණ තමයි අපි අලෙවි කරන්නේ. මේ වසරේ මුල් කාල සීමාවේ යම් මට්ටකට බිස්නස් තිබුණා. එහෙත් මේ දවස්වල බිස්නස් සියයට 50කින් අඩුවෙලා තියෙන්නේ. ගිය වසරට වඩා මේ වසරේ බිස්නස් අඩුයි. මේ දවස්වල සීසන් එක පැවතුණත් බිස්නස්වල වැඩිවීමක් පේන්න නැහැ.

Q බිස්නස් අඩුවීමට බලපෑ හේතු මොනවාද?

මම වසර 18ක ඉඳන් බිස්නස් කරනවා. මේ වෙද්දී වෙළෙඳ සහයකයන් 09 දෙනෙක් අප ආයතනයේ සහ අනුබද්ධිත අනෙක් වෙළෙඳ ආයතනයේ වැඩ කරනවා. මේ දවස්වල සීසන් එකක් තිබුණත් බඩු ගන්න පාරිභෝගිකයන් නැහැ. කඩවල ඉන්නේ මුදලාලි සහ සේවකයෝ ටික විතරයි. කොළඹ කොටුවේ කඩ කියන්නේ පාළු‍වට ගියපු තැනක් නෙමෙයි. එහෙත් දැන් බිස්නස් හොඳටම කඩාවැටිලා තියෙන්නේ.
භාණ්ඩ මිල අඩුවෙයි කියලා පාරිභෝගිකයන් එක එක අදහස්වල ඉන්නවා. පවතින ආර්ථික මට්ටමත් එක්ක පාරිභෝගිකයන්ට භාණ්ඩ මිලදී ගන්න අමාරුයි වගේම වෙළෙන්දන්වන අපටත් භාණ්ඩ ගෙන්වන්න අපහසු තත්වයක් තියෙන්නේ. 

අපි බලාපොරොත්තුවෙන් හිටියා මෙවර අයවැයෙන් හරි යම් සහනයක් ලැබෙයි කියලා. එහෙත් සැලකිය යුතු මට්ටමක සහනයක් ලැබුණේ නැහැ. සීසන් එකේ දී බිස්නස් එකක් තියෙයි කියලා වෙළෙඳපොළට භාණ්ඩ නිකුත් කළත් සාධනීය වෙනසක් තවමත් දකින්න නැහැ. 

මනීෂා වීරසිංහ
ඡායාරූප :ළහිරු හර්ෂණ