දින ගණනකට පසු කොළඹ කොටස් වෙළෙදපොළ තරඟකාරී ලක්ෂණ පෙන්නුම් කළ අතර ආරම්භයේ සිට ගනුදෙනු ක්‍රමයෙන් වර්ධනය විය. දිනය අවසන් වන විට සියලු කොටස් මිල දර්ශකය කලින් දිනයට සාපේක්ෂව ඊයේ (මාර්තු 20) සියයට 1.67 කින් ඉහළ ගියේය.  පසුගිය දින කිහිපය තුළ අඩු මිල ගණන් දක්වා පහත වැටී තිබීමේ වාසි සහගත අවස්ථාව ප්‍රයෝජනයට ගනිමින් කොටස් මිල දී ගැනීමට ආයෝජන අංශ පෙළැඹී සිටියේය.  
ගනුදෙනු අවසන් වන විට සියලු කොටස් මිල දර්ශකය ඒකක 15,662.99  තෙක් ඉහළ ගිය අතර එය දර්ශක 256.77 ක වර්ධනයකි. එස් ඇන්ඩී පී ශ්‍රී ලංකා දර්ශකය 4,700.14 ක් වශයෙන් අවසන් වූ අතර එය දර්ශක 94.93 ක දියුණුවීමක් සේ  දැක්විය හැකිය. 

සියෙරා රු. මිලියන 1,803 ක් වශයෙන් දිනයේ පිරිවැටුමකට වාර්තාගත දායකත්වයක් දැක්වීය.  සිලෝන් කෝල්ඞ් ස්ටෝර්ස් රු. මිලියන 163 ක්, ජෝන් කීල්ස් රු. මිලියන 79 ක්, සම්පත් රු. මිලියන 67 ක්, ටී.ජේ. ලංකා රු. මිලියන 59 ක්, වැලිබල් වන් රු. මිලියන 30 ක්,   බ්‍රවුන්ස් ඉන්වෙස්ට්මන් රු. මිලියන 49 ක්, සෙන්ට්‍රල් ෆින්ෑන්ස් රු. මිලියන 43 ක්, හැටන් නැෂනල් බැංකුව රු. මිලියන 26 ක්, සහ එල්. ඕ. එල්. සී. රු. මිලියන 23 ක් වශයෙන් මෙදින පිරිවැටුමට වැඩිම දායකත්වයක් දක්වන ලද සෙසු සමාගම්  අතර තිබුණි. 

වාර්තා වූ ගනුදෙනු ප්‍රමාණය 11,467 ක් වූ අතර සමාගම් 221 ක කොටස් මිල ඉහළ ගියේය. මිල ගණන් පහත වැටුණ සමාගම් ප්‍රමාණය 37 ක් විය. ඊයේ දිනයේ වෙළෙදපොළ පිරිවැටුම රු. බිලියන 3.67 ක් දක්වා කලින් දිනයටත් වඩා සැලකිය යුතු ඉහළ අගයක් වාර්තා කළේය. තවමත් මිල දී ගැනීම් සඳහා ආයෝජකයන්ට උනන්දු විය හැකි පරිසරයක් නිර්මාණය වී ඇත. පසුගිය වසරේ ආර්ථික දත්ත නිකුත්වීම සමග ස්ථාවර වර්ධනයක් කරා ගමන් කරනු ඇති බවට වන විශ්වාසය ආයෝජන අංශ තුළ පැන නැගෙමින් තිබේ. අදානි සමූහ ව්‍යාපාරය නැවත මෙරට සුළං විදුලිය අංශයේ ආයෝජනය ඉදිරියට ගෙන යනු ඇති බවට ඇති විශ්වාසය සහ තවත් ව්‍යවසාය ගණනක් මෙරට ආයෝජනය සඳහා ඉදිරිපත්වනු ඇති බවට පවතින ආකල්ප වෙළෙඳ පොළ කෙරෙහි බලපා ඇත. 

නිරීක්ෂක