වේල්ලවීදියේ MaxMIX Ingredients Suppliers (Pvt)Ltd වෙළෙඳ ආයතනයේ හිමිකරු සරන් රාජ්

පාරිභෝගික අවශ්‍යතාවට සරිලන පරිදි භාණ්ඩ මිලදී ගැනීමට විශාල ප්‍රදේශයක් පුරා පැතිරුණු පිටකොටුව වෙළෙඳ ක්‍රියාකාරකම්වල කේන්ද්‍රස්ථානයක් වශයෙන් ද සැළකිය හැකිය. ළඟ ළඟම එන උත්සව සමයත් සමඟ කොළඹ කොටුවේ ව්‍යාපාරිකයන්ගේ සූදානම කෙබඳු ද යන්නත්, මේ දිනවල වෙළෙඳාමේ තතු සොයා බැලීමට ගිය ගමනේ දී පිටකොටුවේ මඳක් දුරින් පිහිටා තිබෙන වේල්ලවීදියට පිවිසුණෙමු. කඩිමුඩියේ භාණ්ඩ තොග වාහනවලට පටවන ආකාරය එහි ගිය ගමනේ දී සුලභ දසුනක් විය. 

මේ දිනවල බිස්නස් සම්බන්ධයෙන් වේල්ලවීදියේ MaxMIX Ingredients Suppliers (Pvt Ltd) වෙළෙඳ ආයතනයෙහි හිමිකරුවන සරන් රාජ් මහතා දැක්වූයේ මෙවන් අදහසකි.

Q: මේ දවස්වල වෙළෙඳාම කොහොමද?
බිස්කට් සහ බේකිරි ආශ්‍රිත නිෂ්පාදන සඳහා අවශ්‍ය අමුද්‍රව්‍ය වෙළෙඳපොළට සැපයීම තමයි අපි කරන්නේ. මේ දවස්වල බිස්නස් සාමාන්‍ය මට්ටමක තියෙනවා. ගිය වසරට සාපේක්ෂව මේ වසරේ බිස්නස් හොඳ මට්ටමක පවතිනවා. මේ වෙද්දී හරියටම රාමසාන් සහ සිංහල අවුරුදු සීසන් එක පටන් ගත්තේ නෑ. හරිනම් මේ වෙද්දී සීසන් එක පටන් ගන්න ඕනේ. තව දින කිහිපයකින් බිස්නස්වල වැඩිවීමක් වෙයි කියා බලාපොරොත්තු වෙනවා. 

Q: වෙළෙඳාම අඩුවීමට හෝ වැඩිවීමට බලපෑ හේතු මොනවාද?
පසුගිය වසරවල කොවිඩ් සහ ආර්ථික කඩාවැටීම් එක්ක බිස්නස් අඩුවෙලා තිබුණේ. එහෙත් කාලයත් එක්ක ඒ ගැටලු‍වලට විසඳුම් ලැබෙද්දී නැවතත් බිස්නස්වල වර්ධනයක් දකින්න පුළුවන්. අපි බේකරි ආහාර නිෂ්පාදනය කිරීමට අවශ්‍ය කරන අමුද්‍රව්‍ය සහ බිස්කට් නිෂ්පාදනයට අවශ්‍ය කරන අමුද්‍රව්‍ය දේශීය වෙළෙඳපොළට සහ විදෙස් රටවලින් ආනයනය කරනවා. භාණ්ඩ වැඩි ප්‍රමාණයක් චීනයෙන් තමයි ආනයනය කරන්නේ. ඊට අමතරව ඉන්දියාව, නවසීලන්තය, ඕස්ට්‍රේලියාව, මැලේසියාව වගේ රටවලිනුත් භාණ්ඩ ආනයනය කරනවා. මෙම අමුද්‍රව්‍ය තොග සහ සිල්ලර කියන දෙයංශයෙන්ම පාරිභෝගිකයන්ට ලබා ගැනීමට හැකියාව පවතිනවා. මීට අමතරව භාණ්ඩ නිෂ්පාදන අංශයක් ද ආරම්භ කරලා තියෙනවා. එහි සේවකයෝ 10 දෙනෙක් විතර ඉන්නවා. සමස්ත සේවකයෝ 35 දෙනෙක් අප සමඟ සම්බන්ධ වෙලා වැඩ කරනවා. උත්සව සමයත් එක්ක මීට වඩා මිලදී ගැනීම් වල වර්ධනයක් වෙයි කියන බලාපොරොත්තුවෙන් අපි මේ වෙද්දී අමුද්‍රව්‍ය වෙළෙඳපොළට නිකුත් කරලා තියෙන්නේ. 

මනීෂා වීරසිංහ

ඡායාරූප : ලහිරු හර්ෂණ