භානුක අමරසිංහ
කොළඹ කොටස් හුවමාරුවේ ලැයිස්තුගත දේපළ වෙළෙඳාම් කළමනාකරණ සහ සංවර්ධන සමාගමක් වන මිලේනියම් හවුසිං ඩිවලොපර්ස් පීඑල්සී සමාගමේ කොටස් එහි ගනුදෙනු කිරීම අත්හිටුවීමේ තීරණය ලබන දෙසැම්බර් 31 වැනිදා දක්වා කල් දැමීමට ශ්‍රී ලංකා සුරැකුම්පත් හා විනිමය කොමිෂන් සභාව සිය අනුමැතිය ලබා දී ඇතැයි එම සමාගම පවසයි. 
එම සමාගමේ කොටස් සම්බන්ධයෙන් මීට පෙර ගෙන තිබූ තීරණයකට අනුව එම කොටස් ගනුදෙනු අත්හිටුවීම සැප්තැම්බර් 01 වැනිදා සිදුකිරීමට නියමිතව තිබුණි. ඒ යටතේ 2023 දෙසැම්බර් 07 වැනිදා සිට එම සමාගම කොටස් හුවමාරුවේ watch list ලැයිස්තුවටද මාරු කෙරිණි. 2023 මාර්තු 31 වැනිදායින් අවසන් වූ මූල්‍ය වර්ෂය සඳහා වන ස්වාධීන විගණන වාර්තාවට අනුව මෙම තීරණයට හේතුව විය. එසේම 2024 මාර්තු 31 වැනිදා මෙන්ම 2025 මාර්තු 31 වැනිදා අවසන් වූ මූල්‍ය වර්ෂවලට අදාළ වාර්ෂික වාර්තා තුළ ද මෙම කාරණා මතුව තිබුණි. 
මීට පෙර සෙලින්කෝ ඩිවලොපර්ස් ලිමිටඩ් ලෙස හැඳින්වුණු මිලේනියම් හවුසිං ඩිවලොපර්ස් පීඑල්සී සමාගමේ වර්තමාන වැඩි කොටස් හිමිකාරීත්වය (සියයට 28.28ක්) නවලෝක සමූහයට අයත් Ceyoka (Pvt) Ltd වෙත හිමිව තිබේ.