බාල වයස්කාර ගණිකාවක ඇසුරු කිරීමේ චෝදනාවකට වරදකරුවූ ඉතාලියේ හිටපු අගමැති සිල්වියෝ බෙර්ලූස්කෝනිට එරට මිලාන් නුවර අධිකරණයකින් වසර හතක සිර දඬුවම් නියම කර ඇත.
එම සිර දඬුවමට අමතරව ඔහුට තවදුරටත් ඉතාලි රජයේ තනතුරු හෙබවීම ද අධිකරණය තහනම් කර තිබේ.
දැනට 76 වැනි වියේ පසුවන හිටපු ඉතාලි අගමැතිවරයා සිය පාලන කාලයේදී ලිංගික ජීවිතයට දැඩි ලෙස ලොල්වී සිටි අතර එම කාලයේදී බාල වයස්කාර ගණිකාවන් ඇසුරු කරමින් සාද පැවැත්වීමේ සිද්ධියක් සම්බන්ධයෙන් මිලාන් අධිකරණයේ පැවැති නඩු විභාගයකින් පසුව ඔහු වරදකරු කර ඇත.
මෙම සත් වසරක සිර දඬුවමට එරෙහිව බෙර්ලූස්කෝනි මේ වනවිට අභියාචන පෙත්සමක් ගොනු කර ඇති අතර, එම අභියාචන පෙත්සම විභාගය අවසන්වනතුරු ඔහු බන්ධනාගාර ගත නොකෙරෙන බවද පැවසේ.
මිලාන් අධිකරණය විසින් ඉතාලියේ හිටපු අගමැතිවරයාට එරෙහිව අදාළ දඬුවම නියම කිරීමෙන් පසුව බෙර්ලූස්කෝනි කියා සිටියේ තමා මුළුමනින්ම අහිංසක පුද්ගලයකු බවත්, තමාට දේශපාලන හේතු මත අදාළ චෝදනා ගොනුවී ඇති බවත් ය.