ලිබියාවේ බෙන්ගාසි නුවර ඇමෙරිකා තානාපති කාර්යාලයට එල්ල කෙරුණු ප‍්‍රහාරය තමන් දැඩි ලෙස හෙළා දකින බව ඇමෙරිකා ජනපති බැරැක් ඔබාමා ඊයේ(12)  විශේෂ නිවේදනයක් නිකුත් කරමින් කියා සිටියේය. තානාපති කාර්යාලයට එල්ල වූ ප‍්‍රහාරයෙන් මියගිය ලිබියාවේ ඇමෙරිකා තානාපති කි‍්‍රස් ස්ටීවන්ස් සහ ඔහුගේ නිලධාරීන් තිදෙනාට සිය ශෝකය පළ කරන බවද ජනාධිපතිවරයා පැවසුවේය. තානාපතිවරයා ඇතුළු ඇමෙරිකානුවන් සිවුදෙනාගේ ඝාතනය තමන් හෙළාදකින බව කී ජනපති ඔබාමා ලිබියාවේ සහ ලොව අනෙක් රටවල සිටින ඇමෙරිකානු තානාපති නිලධාරීන්ට දැඩි ආරක්ෂාවක් යෙදවීමට කඩිනම් පියවර ගන්නා බව ද අවධාරණය කළේය. මෙම ප‍්‍රහාරය එල්ල වූයේ ඊශ‍්‍රායල-ඇමෙරිකානුවකු වන සෑම් බැසිල් නැමති තරුණයකු විසින් ඉස්ලාම් ආගමට නිගරු වන අන්දමින් නිර්මාණය කරනු ලැබූ චිත‍්‍රපටයක් නිසා බව විදෙස් මාධ්‍ය වාර්තා සඳහන් කරයි. චිත‍්‍රපටයට විරෝධයපාමින්  ලිබියාවේ බෙන්ගාසි නුවර විරෝධතාවක නිරත අවි ආයුධ සන්නද්ධ කලහකාරී පිරිසක් විසින් තානාපති කාර්යාලයට මෙම ප‍්‍රහාරය එල්ල කරන ලද බව වාර්තා වේ. චිත‍්‍රපටය සම්බන්ධයෙන් අදහස් දැක් වූ ඇෆ්ගන් ජනපති කියා සිටියේ එය ‘අමානුෂික සහ අපහාසාත්මක’ කි‍්‍රයාවක් බවත් තමන් එය තරයේ හෙළාදකින බවත්ය. එම චිත‍්‍රපටය ආගමික සහ සංස්කෘතික සහජීවනයට තර්ජනයක් බව ද කී ඇෆ්ගන් ජනපති ලෝකයේ සාමයටත් යහ පැවැත්මටත් එමඟින් තර්ජනයක් එල්ල වන බව ද සඳහන් කළේය. ප‍්‍රහාරය පිළිබඳව නිකුත් වූ වාර්තාවක දැක්වූණේ තානාපති කාර්යාලය තුළ සිටි තානාපතිවරයා මියගියේ කාබන්මොනොක්සයිඞ් විසවීමෙන් බවය. බෙන්ගාසි නගරය ලිබියාවේ හිටපු නායක කර්නල් මුවම්මර් ගඩාෆිගේ බල කඳවුරක් ලෙස ද සැලකේ.