නොකඩවා ඇද හැළෙන මහ වැසි හේතුවෙන් ගංගා නදිය පිටාර ගැලීමෙන් හටගත් සැඬ රළ පහරට හසුවී, ඉන්දියාවේ හිමාල කඳු පාමුල පිහිටි උත්තරකාන්ද් ප‍්‍රාන්තයේ රුද්‍රප‍්‍රයාග් දිස්ති‍්‍රක්කයේ නගරයක් මුළුමනින්ම විනාශ වූ අතර 23 දෙනෙක් ජීවිතක්ෂයට පත්වූහ.
සහන සේවා නිලධාරීන් පවසන්නේ, පුද්ගලයන් 50 දෙනෙකු ජල ගැලීම්වලට හසුවී ගසාගෙන යෑමෙන් අතුරුදන්ව ඇති බවය. ඊට අමතරව නිවාස අහිමිවීමෙන් ලක්ෂයකට වැඩි පිරිසකට උන්හිටිතැන් අහිමි විය.
සැඬ ජල පහර, ගස් පෙරළා ගෙන නිවාස සුනු විසුණු කරමින් නගරය හරහා ගලා ගිය බවත් නිවාස සහ ගොඩනැගිලි අසුරු සැණින් බිමට සමතලා වූ බවත් ඉන්දීය පුවත් සේවා වාර්තා කරයි.
උත්තරකාන්ද් ප‍්‍රාන්තයේ සෙසු දිස්ති‍්‍රක්කවලින් ද ජල ගැලීම් සහ නාය යෑම් වාර්තා වේ.
සැඬ පහරට හසුවී මාර්ග විනාශ වීමෙන් කොටු වූ පිරිස් බේරා ගැනීමට ඉන්දීය හමුදාව කටයුතු කළ අතර ඒ සඳහා හෙලිකොප්ටර් යානා ද යොදා ගැනිණ. සහන සේවා නිලධාරීන් පැවැසුවේ, අධික වර්ෂාව නිසා එම සහන සේවා කටයුතුවලට බාධා එල්ල වූ බවය.  ඉන්දියාවේ සෙසු ප‍්‍රාන්තවලට ද මේ වනවිට මහ වැසි ඇදහැළෙමින් පවතින අතර නවදිල්ලි නුවර ජාත්‍යන්තර ගුවන්තොටුපොළ වසා දැමීමට ද බලධාරීන්ට සිදුවිය. ඒ, ගුවන්තොටුපොළ ජලයෙන් යටවීම නිසාය.
ධාරාණිපාත වැසි හේතුවෙන් ගුවන් ගමන් සහ දුම්රිය ගමන්වලට ද බාධා එල්ල වී ඇතැයි ද පැවැසෙයි. ඉන්දීය කාලගුණ විද්‍යා බලධාරීන් පවසා ඇත්තේ ඉදිරි තෙදින පුරාවට ද දිගටම මහ වැසි ඇදහැළීමේ අවදානමක් පවතින බවය.

 

ප‍්‍රචණ්ඩ රළ පහර නගරයට කඩා වැදුණු අවස්ථාව
 
මාර්ග සෝදා ගොස් මෝටර් රථ  අනතුරට පත්ව ඇති අයුරු
 
මාර්ගයක් නායයෑමෙන් කොටුවූ පිරිස්