සිරියා තුර්කි දේශසීමාවේ පිහිටි සිරියාවට අයත් අසාස් නමැති නගරය අත්පත් කර ගැනීමට සිරියානු කැරැලිකරුවන් සමඟ එක් වී සිටින අල් කයිඩා සාමාජිකයෝ ඊයේ (19) සමත් වූහ.

අසාස් නගරය පිහිටා ඇත්තේ සිරියානු තුර්කි දේශසීමාවේ සිට කිලෝ මීටර් 5 ක් පමණ දුරිනි. අල් කයිඩාව එම නගරය අත්පත් කර ගත්තේ එහි ආරක්ෂාවට සිටි සිරියානු රජයේ හමුදා සෙබළුන් සමඟ පැය පහක පමණ කාලයක් පුරා සටන් කිරීමෙන් ද පසුවය. එම ප‍්‍රහාරයෙන් සිරියානු රජයේ හමුදා සෙබළු පස් දෙනෙක් ජීවිතක්ෂයට පත්වූහ.

අසාස් නගරය අල් කයිඩාව අතට පත් වීමත් සමඟ සිරියානු ජනාධිපති බෂීර් අල් අසාද් ජාතිය අමතමින් කියා සිටියේ රට අල් කයිඩාව අතට පත් වීමේ අවදානමක් පවතින බවය.

සිරියානු සිවිල් යුද්ධයේදී, සිරියානු රජය පෙරැළීමට සටන් කරන කැරැලිකාර පාර්ශ්වය පිහිටුවා ඇති ‘නිදහස් සිරියානු හමුදාව’ ට සහාය දෙන්නේ ඉරාකයෙන් සිරියාවට පැමිණ සිටින සුන්නි මුස්ලිම් අල් කයිඩා සාමාජිකයෝය.

සිරියානු රජයේ හමුදාව ඉලක්ක කර ගනිමින් ඇමෙරිකාව හමුදා ප‍්‍රහාරයක් එල්ල කිරීමට අදිමදි කරන්නේ ද අල් කයිඩා සාමාජිකයන් සිරියානු අර්බුදයට මැදිහත් වී සිටින නිසාය.

සිරියානු රජය පෙරළා දැමීමට ඇමෙරිකාව එසේ ගුවන් ප‍්‍රහාරයක් එල්ල කළොත්, සිරියාවේ බලය හිමිවන්නේ අල් කයිඩාවේ සහාය ලබන කැරැලිකරුවන්ටය. එය, ඇමෙරිකාවේ හිතවතුන් වන ඊශ‍්‍රායලය, සෞදි අරාබිය සහ කටාර් යන රටවලට තර්ජනයක් වනු ඇත.

සිරියානු ජනපති බෂීර් අල් අසාද්ගේ රෙජීමය සමඟ සටන් කරන වඩාත් ප‍්‍රබල කැරැලිකාර කණ්ඩායම වන්නේ ජබාත් අල් නුස්රා පෙරමුණය. නුස්රා පෙරමුණ ත‍්‍රස්ත සංවිධානයක් යැයි නම් කරමින් එය හුදෙකලා කිරීමට ඇමෙරිකාව උත්සහ කළේ ඉකුත් වසරේදීය.

දේශපාලන විචාරකයන් පෙන්වා දෙන පරිදි, ඇමෙරිකාව සතුටු වන්නේ අසාද් රෙජීමය බිඳ දැමීමෙන් පසු නිදහස් ස්වාධීන විපක්ෂ දේශපාලන කණ්ඩායම් හෝ ඇමෙරිකාවේ හෝ ඇමෙරිකාවේ මිතුරා වන සෞදි අරාබියේ හෝ හඬට කීකරු මධ්‍යස්ථමතධාරී ඉස්ලාමීය දේශපාලන කණ්ඩායම් සිරියාවේ බලයට පැමිණෙන්නේ නම් පමණි.

කෙසේ නමුත් එවැනි කිසිදු දේශපාලන කණ්ඩායමක් කැරැුලිකරුවන් අතර නොසිටින බව එම විචාරකයෝ පැහැදිලි කරති. එම නිසා මේ වනවිට ඇමෙරිකාවේ ඉලක්කය වී ඇත්තේ සිරියාවෙන් පිටුවහල් කළ අසාද්ට වෛර කරන විපක්ෂ දේශපාලන කණ්ඩායම්වලට අසාද්ගෙන් පසු සිරියාවේ පාලන බලය ලබා දීමය.

සිරියානු අර්බුදයේදී වැඩි වාසි අත්වන්නේ අසාද්ට යැයි ද විචාරකයෝ පෙන්වා දෙති. කිසියම් හෝ අවස්ථාවක ඇමෙරිකාව යුද ප‍්‍රකාශ කළොත්, ඇෆ්ගනිස්තානයේ, ඉරාකයේ සිදු කළ අයුරින් මහා පරිමානයේ හමුදාමය මැදිහත් වීමක් නොකරන බව ජනපති බෂීර් අල් අසාද් දනී.
 

සිරියානු කැරැලිකරුවෝ