පැසිපික් දුපත් හි වනවාටු රාජ්‍යය හරහා හමාගිය දරුණු සුළි සුළඟක් හේතුවෙන් එහි අගනුවර වු පෝට් විලා හි නිවාස වලින් සියයට අනූවකට වැඩි ප්‍රමාණයක් විනාශ වී ඇතැයි විදෙස් මාධ්‍ය වාර්තා කරයි.

රතු කුරුස ප්‍රකාශකයෙක් පැවසුවේ සමහර ප්‍රදේශයන්හි නිවාස සියල්ලම මෙම සුළි කුණාටුව හේතුවෙන් ගසාගෙන ගොස් ඇති බවයි.

මෙම ව්‍යාසනය හේතුවෙන් පුද්ගලයන්  8 දෙනෙක්ද මියගොස් තිබේ. මෙම ගණන තවත් වැඩි විය හැකි බව සහන සේවකයෝ පවසති. දස දහස් ගණනකට උන් හිටි තැන් අහිමි ගොසිනි.

හමාගිය සුළි සුළගේ වේගය පැයට කිලෝ මිටර් 270 කි.  

වනවාටු රාජ්‍යයේ ජනගහනය 267,000 කි. එහි ප්‍රධාන දූපත් 67කි. අගනුවර ඇති පෝට් විලා හි ජනගහණය 47,000 ක් පමණ වෙති.

පෝට් විලා හි ගුවන් තොටුපොළ කුණාටුව හේතුවෙන් වසා දමා තිබේ. වනවාටු රාජ්‍යයට පිරිසිදු වතුර, සනීපාරක්ෂක කටයුතු සහ කූඩාරම් වැනි ආධාර අවශ්‍ය වි තිබේ. මේවා රැගත් එක්සත් ජාතින්ගේ සංවිධානයට අයත්  පළමු ගුවන් යානය ගොඩබැස්සවීමට හැකිවන පරිදි වසා දමා ඇති පෝට් විලා ගුවන් තොටුපොළෙන් කොටසක් විවෘත කිරීමට නියමිතය. එක්සත් ජාතින්ගේ ආපාදා තක්සේරු කණ්ඩායමක් ද වනවාටු වෙත ලඟාවිමට නියමිතය.

වනවාටු ජනාධිපති බැල්ඩ්වින් ලොන්ස්ඩේල් ජාත්‍යන්තර ප්‍රජාවගෙන් තම රටට ආධාර ඉල්ලා ආයාචනා කර ඇතැයිද මාධ්‍ය වාර්තා පෙන්වා දෙයි. මේ සම්බන්ධයෙන් ආධාර දීමට යුරෝපා සංගමය, ඕස්ට්‍රෙලියාව, නවසීලන්තය හා එක්සත් රාජධානිය යන රටවල් දැනටමත් ඉදිරිපත් වි සිටිති.