අති මහත් රහස්‍යභාවයක් ඇතිව නිපදවිමින් සිටින මිසයිලයක අත්හදා බැලීම වැරදී එය පුපුරා ගිය බව පෙන්ටගන් ආරංචි මාර්ග සඳහන් කරයි.

වාර්තා වන ආකාරයට මිසයිලය ගුවන්ගත කිරීමට සැරසෙද්දී එය නැවත පොළවටම කඩා වැටී තිබේ.සිදුව ඇති හානිය මෙතෙක් ගණන් බලා නොමැති අතර ජීවිත හානි කිසිත් සිදුව නොමැත.

මිසයිලය අත්හදා බැලීම සිදුකෙරී ඇත්තේ ඇලස්කාවේ පිහිටි ඇමරිකාවට අයත් කෝඩියැක් මිසයිල විදුම් මධ්‍යස්ථානයේදීය.

පිපිරුම මධ්‍යස්ථානයේ සිට සැතපුම් 12 ක් පමණ දුරින් පිහිටි ග්‍රෙවිල් තුඩුවේ වැසියන්ට පවා හොදින් ඇසී තිඛෙන අතර මහා විශාල ගිනි බෝලයක් ඈතින් දිස්වූ බවද ඔවුන් කියයි.

මෙම මිසයිලය සම්බන්ධ කරුණු අතරින් පතර මාධ්‍යයට පසුගිය සමයේදී හෙළිදරව් කෙරුණු අතර ඒවාට අනුව ඇමරිකාව මේ සැළසුම් කරමින් සිටින්නේ ඉතාම කෙටි කාලයකදී ලෝකයේ ඕනෑම ස්ථානයකට ප්‍රහාර එල්ල කළ හැකි මිසයිලයකි.

එහි ගමන් වේගය කෙතරම්ද යත් පැයක් ගතවීමට මත්තෙන් එයට සැතපුම් 3500 ක් දුර ආවරණය කළ හැකි යැයි සදහන්ය.

පසුගිය 2011 වසරේදීද මෙම මිසයිලයේම අත්හදා බැලීමක් සිදුකෙරුණු අතර එය සාර්ථකව සිදුවු බව එදවස පෙන්ටගනය නිවේදනය කළේය.

වරද කොතැන සිදුවී ඇත්දැයි සොයා පරීක්ෂණ කෙරෙමින් පවතින බව පෙන්ටගනය කියයි.