යුක්රේන ගුවන් යානය කඩා වැටුණේ මිසයිල ප්‍රහාරයකින් බවට එල්ල වන චෝදනා ප්‍රතික්ෂේප කරන බව ඉරාන සිවිල් ගුවන් සේවා අධිකාරියේ ප්‍රධානී අලි අබේද්සාදේ අද (10) පැවැසීය.

ගුවන් යානය කඩාවැටුණේ මිසයිල ප්‍රහාරයකින් බවට තොතුරු ලැබී ඇති බවට ඇමෙරිකාව, බ්‍රිතාන්‍ය සහ කැනඩාව වාර්තා කිරීමත් සමඟ තෙහ්රාන් අගනුවරදී මාධ්‍ය සාකච්ඡාවක් පවත්වමින් ඔහු ඒ බව කීවේය.

“එක් දෙයක් සහතිකයි. ගුවන් යානයට මිසයිල ප්‍රහාරයක් එල්ල වුණේ නැහැ” යැයි අලි අබේද්සාදේ කීය.

ගුවන් යානය කඩා වැටුණේ ඉරාන ගුවන් ආරක්ෂක පද්ධතියේ සිදු වූ දෝෂයකින් යැයි ද ඇමෙරිකාව, බ්‍රිතාන්‍ය සහ කැනඩාව බුද්ධි අංශ තොරතුරු වාර්තා කර ඇත.

මෙම ගුවන් අනතුර ඉරානය 1988 වසරෙන් පසු මුහුණ දුන් දරුණුතුම අනතුර විය. එම වසරේදී ඇමෙරිකානු හමුදා අත්වැරැදීමකින් එල්ල කළ ප්‍රහාරයකින් ඉරාන ගුවන් සේවයට අයත් යානයක් අනතුරට පත්වූ අතර අනතුරින් එහි සිටි 290 දෙනාම මරණයට පත්වූහ.

“යානයේ කළුපෙට්ටිය දත්තා ලබාගැනීමට පෙර කරන ඕනෑම ප්‍රකාශයක් මතයක් විතරයි. ඇත්ත හොයාගන්න නම් විමර්ශන කරන්න ඕනෑ. කළු පෙට්ටියේ දත්ත ලබාගන්න ඕනෑ” යැයි අලි අබේද්සාදේ පැවැසීය.

ඒ.එෆ්.පී.

055