නැගෙනහිර යුක්රේණයේදී අනතුරට පත්වු මැලේසියා එම්එච් 17 ගුවන් යානයේ අනතුර වු ප්‍රදේශයේ තිබී සොයාගනු ලැබූ යානා සැකිලි කොටස් පරික්ෂණ කටයුතු සඳහා නෙදර්ලන්තයේ හමුදා කඳවුරකදී නැවත එකලස් කිරීමට නියමිත බව ඕලන්ද බලධාරින් ප්‍රකාශ කර ඇතැයි විදෙස් මාධ්‍ය වාර්තා කරයි.

ඕලන්ද රජයේ අධික්ෂණය යටතේ යුක්රේන හදිසි සේවාව මගින් එකතුකරගත් මෙම යානයේ සැකිල්ලේ සුන්බුන් ට්‍රක්රථ මගින් ගුවන් හමුදා කඳවුර වෙත ගෙන යාමට නියමිතය.

මගීන් 298 දෙනෙකුට මරු කැඳවමින් පසුගිය ජූලි 17 දින කඩා වැටුනු බෝයිං 777 ගුවන් යානයේ සුන්බුන් මාස ගණනක් තිස්සේ සී සී කඩ පැතිර තිබුණේ එම ප්‍රදේශයට පිටස්තර පරික්ෂක කණ්ඩායම්වලට  ඇතුල් වීමට නොහැකිව තිබු හෙයිනි.

පරික්ෂණ කණ්ඩායම් විශ්වාස කරණ්නේ මෙම ගුවන් යානයට පොලවේ සිට එල්ල කරණ ලද මිසයිල් ප්‍රහාරයකින් අනතුරට පත්වු බවයි. නමුත් ගුවනේ දි එල්ල කරණ ලද ප්‍රහාරයකින් මෙම යානාව විනාශ වු බවට කර ඇති මොස්කව් න්‍යායද ඔවුන් විසින්  මුළුමනින්ම ප්‍රතික්ෂේප කර නොමැත.

ඕලන්ද ආරක්ෂක මණ්ඩලය නිවේදනයක් නිකුත් කරමින් පවසන්නේ එරට ආරක්ෂක අමාත්‍යාංශය මගින් මෙම ගුවන් යානයේ කොටස් ප්‍රවාහන සඳහා පහසුකම් සපයනු ලබන බවයි. මෑතකදී සොයා ගනු ලැබු මිනිස් සිරුරු කොටස් පසුගිය සිකුරාදා නෙදර්ලන්තයට ගුවන් මගින් ගෙනගොස් තිබේ. එම කොටස් හඳුනා ගැනීම සඳහා තවත් හමුදා කඳවුරක් වෙතට ගෙන යන ලදී.

අනතුරට පත් ගුවන් යානයේ සිටි මගින් ගෙන් තුනෙන් දෙකක් පමණ ඕලන්ද ජාතිකයන් වීම හේතුවෙන් ඕලන්ද බලධාරින් මෙම පරික්ෂණ කටයුතු වෙනුවෙන් පෙරමුණ ගෙන තිබේ. එම්එච් 17 ගුවන් යානය අනතුරට පත් වන විට ඇම්ස්ටර්ඩෑන් සිට ක්වාලාලම්පූර් වෙත පියාසර කරමින් තිබිනි.