බටහිර අපි‍්‍රකාවට අයත් මාලී රාජ්‍යයේ සිදුවූ හමුදා කුමන්ත‍්‍රණයෙන් පසු, කැරැලිකාර හමුදා සෙබළුන් එරට ජනාධිපති මන්දිරය අත්පත් කර ගත් අවස්ථාවේදී ජනපතිවරයා බේරී පලා ගියේය. කැරැලිකාර හමුදා මාලී ජනාධිපති අමාදු ටුමානී ටූරේට අභියෝග කරමින් බාමාකෝ නුවර පිහිටි ජනපති මන්දිරය වැටලූවේ පෙරේදා (21) රාති‍්‍රයේය. එම අවස්ථාවේදී ජනපති මන්දිරයේ ආරක්ෂාවට සිටි හමුදා නිලධාරීන් සහ ආරක්ෂක නිලධාරීන්, කැරැලිකාර හමුදා භටයන්ට වෙඩි තබා ඇති අතර දෙපිරිස අතර පැය කීපයක් තිස්සේ වෙඩි හුවමාරු පැවැතිණි. එම වෙඩි හුවමාරුව මැද ජනපති ටූරේ, ජනපති මන්දිරයෙන් ආරක්ෂිත ස්ථානයකට යොමු කිරීමට ඔහුගේ ආරක්ෂක නිලධාරීහු සමත් වූහ. ජනපතිවරයා ආරක්ෂිතව පිටව ගිය වහා මන්දිරයේ ආරක්ෂාවට සිටි සෙබළුන් ද පසු බසින්න වූ අතර, කැරැලිකාර හමුදා භට පිරිස් මන්දිරයේ බලය අල්ලා ගත්හ. කැරැලිකාර සෙබළු ඊයේ (22) උදෑසන එරට විදේශ ඇමැති සොමෙයිලෝ බොබේයේ මායිගා සහ අභ්‍යන්තර කටයුතු ඇමැති කෆෝහූනා කෝනේ අත්අඩංගුවට ගත්හ. එම අවස්ථාවේදී හමුදාව කියා සිටියේ රටේ පාලන බලය තමන් යටතේ පවතින බවය. මේ වනවිට රට පුරා ඇඳිරි නීතිය ප‍්‍රකාශයට පත් කර ඇතැයි ද වාර්තා වේ. රටේ සාමය ස්ථාපිත කිරීමට වගබලා ගන්නැයි ප‍්‍රංශ රජය මාලි හමුදාවෙන් ඉල්ලීමක් කර ඇත. මාලී රාජ්‍යය කලක් ප‍්‍රංශයේ යටත් විජිතයක්ව පැවැතිණි. ජනපති අමාදු ටුමානී ටූරේ