බලතල අයථා ලෙස භාවිතා කළේ යැයි චෝදනා ලැබ සිටින මාලදිවයිනේ හිටපු ජනාධිපති මොහොමඞ් නෂීඞ්ගේ නඩු විභාගයේ දෙවැනි දිනය ඊයේ (2) ට යෙදී තිබුණු නමුත් නෂීඞ් අධිකරණය හමුවේ පෙනී නොසිටියේය. මාලදිවයින මාධ්‍ය වාර්තා කළේ නෂීඞ් අධිකරණ නියෝගයට එරෙහිව යමින් බෝට්ටුවක නැගී මාලේ අගනුවරින් ද පිටවී ගිය බවය. තමාට එල්ල වී ඇති චෝදනා නෂීඞ් තරයේ ප‍්‍රතික්ෂේප කරයි. නඩු විභාගය ආරම්භ වූයේ පෙරේදා (1) ය. නඩු විභාගය පැවැත්වෙන්නේ බලයේ සිටිද්දී නෂීඞ් සිය බලතල අනිසි ලෙස භාවිතා කළේ යැයි චෝදනා එල්ල වී ඇති නිසාය. නඩු විභාගය හේතුවෙන් හිටපු ජනපතිවරයාට රටින් පිටවීම ද තහනම් කර තිබේ. අධිකරණ නියෝගයට පිටුපා මාලේ අගනුවරින් පිට වී ගිය නෂීඞ් අත්අඩංගුවට ගැනීමට මාලදිවයින අධිකරණය කටයුතු කරනු ඇතැයි විදෙස් පුවත් සේවා වාර්තා කරයි. ජනතා විරෝධය මැද නෂීඞ් බලයෙන් ඉවත් වූයේ ඉකුත් පෙබරවාරි හත් වැනිදාය. ඒ, උප ජනපති ධුරයේ සිටි මොහොමඞ් වහීඞ්ට බලය පවරා දෙමිනි. වහීඞ්, මාලදිවයිනේ ජනාධිපති ලෙස දිවුරුම් දුන් අතර නෂීඞ් චෝදනා කළේ විපක්ෂ කණ්ඩායම් සහ ආරක්ෂක අංශ සමඟ එක් වී වහීඞ් කුමන්ත‍්‍රණය කර තමා බලයෙන් නෙරපා දැමූ බවය. නෂීඞ්ගේ එම චෝදනා සම්බන්ධයෙන් ජාත්‍යන්තර පරීක්ෂණයක් ද පැවැති අතර, මාලදිවයිනේ කිසිදු කුමන්ත‍්‍රණයක් සිදු නොවුණු බවත් නෂීඞ්ගෙන් වහීඞ්ට බලය පැවැරීම නීත්‍යානුකූලව සිදුවූ බවත් තහවුරු විය.