සෝමාලියාවේ නව ජනාධිපති හසන් ෂීක් මොහමඞ් ඉලක්ක කරගෙන පෙරේදා (12) එල්ල වූ ත‍්‍රස්ත ප‍්‍රහාරයකින් ජනාධිපතිවරයා දිවි ගලවාගෙන ඇතැයි එරට රජය පවසයි. ප‍්‍රහාරය එල්ල වී ඇත්තේ ජනාධිපතිවරයා මොගඩිෂු නුවර හෝටලයක කෙන්යානු විදේශ ඇමැතිවරයා හමුවී සාකච්ඡා පවත්වමින් සිටින අතරතුරදීය. ප‍්‍රහාරයෙන් හමුදා භටයන් තිදෙනෙකු ජීවිතක්ෂයට පත්ව ඇති බව වාර්තා වේ. ප‍්‍රහාරයෙන් මියගොස් ඇත්තේ සෝමාලි හමුදා භටයන් තිදෙනෙකු සහ උගන්ඩා ආරක්ෂක අංශ සාමාජිකයෙකු බව මාධ්‍ය වාර්තා සඳහන් කරයි. මරාගෙන මැරෙන බෝම්බකරුවන් තිදෙනකු හෝටලයට කඩාවැදීමට උත්සාහ ගත් අවස්ථාවේදී ඉන් දෙදෙනකුට ආරක්ෂක අංශ සාමාජිකයන් වෙඩි තැබූ අතර ඔවුන් දෙදෙනා රැගෙන ආ බෝම්බ එම ස්ථානයේදී පුපුරුවා ගත් බව සෝමාලියා හමුදා ප‍්‍රකාශකයෙක් පැවැසීය. හෝටලයේ තාප්පයට නැගීමට උත්සාහ ගත් අනෙක් බෝම්බකරුට ආරක්ෂක අංශ සාමාජිකයන් විසින් වෙඩිතබන ලද බව ද ඔහු කීය. ‘ජනාධිපතිවරයා රැඳී සිටි හෝටලය දෙසින් විශාල පිපිරීම් හඬක් ඇසුණා. හෝටලය ඇතුළත සිටි කිසිවෙකුටත් හානියක් සිදු වූයේ නැහැ. එම ප‍්‍රහාරයෙන් ටිකවේලාවකට පසුව පැවැති මාධ්‍ය හමුවකටද ජනාධිපතිවරයා සහභාගී වුණා’ යැයි එම හමුදා ප‍්‍රකාශකයා වැඩිදුරටත් සඳහන් කළේය. මෙම ප‍්‍රහාරය එල්ල කරන ලද්දේ අල් කයිඩා සංවිධානය හා සබඳතා පවත්වන අල් ෂෙබාබ් ත‍්‍රස්තවාදී සංවිධානයේ සාමාජිකයන් තිදෙනකු විසිනි. එක්සත් ජාතීන්ගේ සංවිධානය සෝමාලි රජය හා එක්ව තම සංවිධානය නීතිවිරෝධී බව ප‍්‍රකාශ කිරීමට එරෙහිව ඉකුත් අඟහරුවාදා දිනයේදී අල් ෂෙබාබ් ප‍්‍රකාශකයෙක් එරට නව රජයට අනතුරු ඇඟවීය. සෝමාලි රජයේ හමුදා මොගඩිෂු නගරය ෂෙබාබ් සටන්කාමීන්ගෙන් මුදා ගෙන තිබුණද විදේශීය සහ එරට රජයේ නිලධාරීන් ඉලක්ක කර ගෙන එල්ල කරන ප‍්‍රහාර දිනෙන්දින වැඩි වන බව එරට මාධ්‍ය වාර්තා සඳහන් කරයි. එම සටන්කාමීන් පවසන්නේ නිදහස් සෝමාලියාවක් බිහි කරන තුරු සිය සටන අත්නොහරින බවයි.