මැතිවරණයට ඇඟිලි ගසන්න එපා යැයි ඇමෙරිකා එක්සත් ජනපද ජනාධිපති ඩොනල්ඞ් ට්‍රම්ප් මහතා අද (28) රුසියානු ජනාධිපති ව්ලැදිමීර් පුටින් මහතාට පැවැසීය.

ජී-20 සමුළුවට සහභාගී වීම සඳහා ඇමෙරිකානු ජනාධිපති ඩොනල්ඞ් ට්‍රම්ප් මහතා, රුසියානු ජනාධිපති ව්ලැදිමීර් පුටින් මහතා, චීන ජනාධිපති ෂී ජින්පින්ග් මහතා ඇතුළු ජී -20 කණ්ඩායමේ රටවල රාජ්‍ය නායකයෝ ජපානයේ ඔසාකා නුවරට පැමිණ සිටිති.

ජී-20 සමුළුවේ ආරම්භක දිනයට අතරවාරයේ දී ඇමෙරිකානු ජනාධිපතිවරයා සහ රුසියානු ජනාධිපතිවරයා අතර කෙටි හමුවක් පැවැත්විණි.

එම අවස්ථාවේදී මැතිවරණයට ඇඟිලි ගසන්න එපා යැයි රුසියානු ජනාධිපතිවරයාට පවසන්නේ දැයි මාධ්‍යවේදියෙක් ඇමෙරිකානු ජනාධිපතිවරයාට පැවැසීය. ඊට සිනාසුණු ඇමෙරිකා ජනාධිපතිවරයා, රුසියානු ජනාධිපති පුටින් දෙසට සෙල්ලක්කාර ලෙස ඇඟිල්ලක් දිගුකර “ඡන්දෙට ඇඟිලි ගහන්න එපා ජනාධිපතිතුමා, ඇඟිලි ගහන්න” එපා යැයි විහිළුවෙන් පැවැසීය.

රුසියානු ජනාධිපති ව්ලැදිමීර් පුටින්ට මහතාට ඊට කිසිවක් නොකී අතර සිනහාවකින් ප්‍රතිචාර දුන්නේය. 

ඇමෙරිකානු ජනාධිපති ඩොනල්ඞ් ට්‍රම්ප්ට ජනාධිපති ධුරයට පත්වීමට රුසියාව උපකාර කළේ යැයි චෝදනා එල්ල විය. ඒ සම්බන්ධයෙන් කරන ලද විමර්ශන වලදී රුසියාව 2016 වසරේ පැවැති ඇමෙරිකානු එක්සත් ජනපද ජනාධිපතිවරණයට රුසියාව මැදිහත් වූ බවත් ඩොනල්ඞ් ට්‍රම්ප්ගේ මැතිවරණ ප්‍රචාරණ ක්‍රියාවලියට රුසියාව සහාය දුන් බවත් අනාවරණය වී තිබේ. 

ෆින්ලන්තයේ හෙල්සින්කි හිදී පසුගිය වසරේ පැවැති මතභේදාත්මක හමුවෙන් පසුව නායකයන් දෙදෙනා හමු වූ පළමු අවස්ථාව මෙය විය. 

ඒ.එෆ්.පී. ඇසුරිනි 

055