ඉන්දීය අග්‍රාමාත්‍ය නරේන්ද්‍ර මෝදිගේ බිය, කෝපයකට හැරී ඇතැයි කොංග්‍රස් පක්ෂයේ සභාපති රාහුල් ගාන්ධි අද (20) පැවැසීය.

භාරතීය ජනතා පක්ෂය ප්‍රමුඛ ආණ්ඩුව සහ අගමැති මෝදිට එරෙහිව ඉදිරිපත් කර තිබූ විවාදය අතරවාරයේදී රාහුල් ගාන්ධි ඒ බව සඳහන් කළේය. 

  “අග්‍රාමාත්‍යවරයා සහ භාරතීය ජනතා පක්ෂයේ නායකයා යනු වෙනස්ම ආකාරයේ දේශපාලනඥයන් දෙදෙනක්. ඔවුන් අපි (කොංග්‍රසය) වගේ නෙවෙයි. අපි ජය පරාජය විඳ දරාගන්නවා. බලයේ ඉන්නවා. බලය නොමැතිවත් ඉන්නවා.

එහෙත් ඔවුන්ට බලය නොමැතිව ඉන්න බැහැ. ඔවුන් බලය අහිමි වෙනවාට බයයි. ඒ බය දැන් කෝපයකට හැරිලා” යැයි විවාදයට එක්වෙමින් රාහුල් ගාන්ධි කීවේය. 

ඉන් අනතුරුව ඉන්දීය අග්‍රාමාත්‍ය නරේන්ද්‍ර මෝදි වෙත ගිය රාහුල් ගාන්ධි ඔහු බඳාගෙන නැවතත් තම අසුනට පැමිණියේය. 

“කොංග්‍රසයේ වැදගත්කම පෙන්වාදීම ගැන මම අගමැතිවරයාට ස්තූතිවන්ත වෙනවා. ෂිව දෙවියන්ගේ සත්‍ය තේරුම පෙන්වාදීම වෙනුවෙන් මම අගමැතිවරයාට කෘතඥ වෙනවා.

මම දන්නවා ඔබට මා පරිණත නැති කෙනෙක්, නොමේරූ කෙනෙක් වෙන්න පුළුවන්. සමහර විට මොට්ටයෙක් වෙන්න පුළුවන්. එහෙත් මට ඔබ ගැන පොඩි හෝ කේන්තියක්වත් නැහැ” යැයි ද රාහුල්  ගාන්ධි කීය. 

“චීනය පැය 24කදී තරුණයන්ට රැකියා 50,000ක් දීලා. මේ ආණ්ඩුව පැය 24කදී තරුණයන්ට දී තිබෙන රැකියා සංඛ්‍යාව 400යි” යැයි ද රාහුල් ගාන්ධි මෙහිදි භාරතීය ජනතා පක්ෂ ආණ්ඩුවට චෝදනා කළේය. 

ගුවන් යානා මිලදී ගැනීමේ ක්‍රියාවලියකදී සිදු වූ වංචාවක් ඇතුළු වංචා දූෂණ කිහිපයක් සම්බන්ධයෙන් රාහුල් ගාන්ධි සිය කතාවේදී අගමැති මෝදී ප්‍රමුඛ භාරතීය ජනතා පක්ෂ ආණ්ඩුවට චෝදනා එල්ල කළේය. 

ද හින්දු 

055