ඇෆ්ගනිස්තානයේ කාබුල් අගනුවරට හදිසියේ පැමිණි බි‍්‍රතාන්‍ය අගමැති ඬේවිඞ් කැමරන් ඊයේ (19) එරට ජනපති හමීඞ් කර්සායි හමුවූයේය. අගමැති කැමරන් ආරක්ෂක අංශ නිලධාරීන් පිරිවරා ඇෆ්ගනිස්තානයේ කාබුල් නුවරට පැමිණියේ පෙරේදා (18) රාති‍්‍රයේය. ඇෆ්ගනිස්තානයට පය තැබූ විගස ඔහු බි‍්‍රතාන්‍ය හමුදා සේනාංක රැඳී සිටින බැස්ටියොන් කඳවුරේ සංචාරය කළේය. එහිදී බි‍්‍රතාන්‍ය සෙබළුන් හමුවෙමින් ඔවුන්ගේ සුවදුක් විමසා බැලීමට ද අගමැතිවරයා අමතක නොකළේය. අගමැතිවරයාගේ එම සංචාරය හදිසියේ සිදුවූයේ අල් කයිඩා හෝ තලේබාන් සටන්කාමීන්ගෙන් හෝ ප‍්‍රහාරයක් එල්ල වීමේ අවදානමක් පැවැති නිසා යැයි බි‍්‍රතාන්‍ය ආරක්ෂක අංශ පෙන්වා දෙයි. වසර 10 කට වැඩි කාලයක් තිස්සේ පවතින ඇෆ්ගන් යුද්ධය 2014 වසර වෙද්දී අවසන් කිරීමට නේටෝ හමුදා බලාපොරොත්තු වෙයි. බි‍්‍රතාන්‍යය ද නේටෝ සාමාජික රාජ්‍යයක් වන අතර එරට හමුදා සෙබළු 9,500 ක් ඇෆ්ගනිස්තානයේ ඉස්ලාමීය සටන්කාමීන්ට එරෙහිව සටන් වදිති. බි‍්‍රතාන්‍යය ඇමෙරිකාව ප‍්‍රමුඛ නේටෝ හමුදා ඇෆ්ගනිස්තානයෙන් පිට වී යන්නේ එරට ආරක්ෂක කටයුතු ඇෆ්ගන් රජයට සහ ආරක්ෂක අංශවලට පවරමින්ය. නේටෝ හමුදා ඇෆ්ගනිස්තානයෙන් පිටවී යෑමෙන් පසු රටේ ආරක්ෂක කටයුතු සම්බන්ධයෙන් බි‍්‍රතාන්‍ය අගමැතිවරයා ඇෆ්ගන් ජනපති සමඟ දීර්ඝ වශයෙන් සාකච්ඡා කළේය. තලේබාන් සටන්කාමීන් සමඟ සාම සාකච්ඡා ඇති කිරීම සම්බන්ධයෙන් ද රාජ්‍ය නායකයෝ අවධානය යොමු කළහ. තලේබාන් සංවිධානය සහ ඇෆ්ගන් රජය අතර සාම සාකච්ඡා සඳහා පාකිස්තානයේ දායකත්වයද ඉතා වැදගත් බව බි‍්‍රතාන්‍ය අගමැතිවරයා අවධාරණය කළේය. ජනපති කර්සායි හමුවෙමින්...