2009 වසරේ පකිස්තානයේ තරග සංචාරයක නියැළී සිටි ශ්‍රී ලංකා ක්‍රිකට් කණ්ඩායමට ඉලක්ක කළ ඝාතන තැත පසුපස සිටි පකිස්තාන හමුදා වෛද්‍යවරයෙකු හා තවත් ත්‍රස්තයින් දෙදෙනෙකු එල්ලා මරා දැමූ බවට එරට බන්ධනාගාර දෙපාර්තමෙන්තුව නිවේදනයක් නිකුත් කර තිබේ.

වෛද්‍ය උස්මාන් යනුවෙන් තමන් හදුන්වාගෙන ඇති බව කියන මේ වෛද්‍යවරයා ක්‍රිකට් කණ්ඩායමට එල්ල වූ ප්‍රහාරය සැළසුම් කළ මහ මොළකරු ලෙස සැළකුණි.

පකිස්තානය කලක සිට අපරාධකරුවන්ට මරණ දඬුවම ලබාදීම අත්හිටුවා තිබුණුද පසුගියදා පෙෂාවර් ප්‍රදේශයේ පාසලකට කඩාවැදුණු ත්‍රස්තයින් පිරිසක් පාසැල් දරුවන් ඇතුළු 149 දෙනෙකු ඝාතනය කිරීමේ සිදුවීමෙන් පසු මරණ දඩුවම නැවත වරක් බලාත්මක කිරීමට එරට බළධාරීන් කටයුතු කර ඇත.

මේ හා සමගම පකිස්තානයේ ප්‍රධාන සිරගෙවල් වලට නිවේදනයක්ද නිකුත් කර තිබෙන ඔවුන් එහි සඳහන් කර තිබෙන්නේ මරණ දඩුවම නියමවී තිබෙන ත්‍රස්ත නායකයින් ගලවාගැනීමට ඔවුන්ගේ අනුගාමිකයින් ප්‍රහාර එල්ල කළ හැකි නිසා ආරක්ෂාව තර කිරීමට වහාම පියවර ගන්නා ලෙසයි.

පෙෂාවාර් ප්‍රහාරයෙන් පසු කිසිදු අනුකම්පාවක් නොදක්වා පකිස්තානයේ ඔඩුදුවා ඇති ත්‍රස්තවාදය හා අන්තවාදය මුලිනුපුටා දමන බව පක්ෂ විපක්ෂ දේශපාලඥයින් හා ආරක්ෂක අංශ ශපථ කර ඇත.