එළඹෙන මැයි 11 වැනිදා පැවැත්වීමට නියමිත පාකිස්තාන මහමැතිවරණයට තරග කිරීමට හිටපු ජනපති පර්වේස් මුෂාරෆ් සුදුස්සකු නොවන බවට තීන්දු කිරීමෙන් පසුව ඉස්ලාමාබාද් මහාධිකරණය ඊයේ (18) ඔහු අත්අඩංගුවට ගැනීමේ වරෙන්තු නිකුත් කළේය.
බලයේ සිටි සමයේදී ව්‍යවස්ථාවේ කි‍්‍රයාකාරීත්වය තාවකාලිකව අත්හිටුවීමත් ජ්‍යෙෂ්ඨ අධිකරණ විනිසුරුවරුන් තනතුරුවලින් පහකිරීම සම්බන්ධයෙන් එල්ල වී ඇති චෝදනා නිසා මුෂාරෆ්ට මහමැතිවරණයට තරග කිරීමේ අවස්ථාව අහිමි වූ බව මහාධිකරණ විනිසුරුවරු ප‍්‍රකාශ කළහ.
අත්අඩංගුවට ගැනීමේ නියෝග නිකුත් කිරීමත් සමඟ මුෂාරෆ් සිය ආරක්ෂක නිලධාරීන් සමඟ ඉක්මනින් ඉස්ලාමාබාද් නුවරට ඔබ්බෙන් පිහිටි සිය නිවෙස වෙත ගිය බව මාධ්‍ය වාර්තා සඳහන් කරයි.
නැවතත් දේශපාලනයට පිවිසීමේ අපේක්ෂාවෙන් සිටි මුෂාරෆ්ගේ සිහින බොඳ කරමින් ඉකුත් 16 වැනිදා පෙෂාවොර් අධිකරණය තීරණය කළේ ඔහු එළඹෙන මහමැතිවරණයට තරග කිරීමට සුදුස්සකු නොවන බවයි.
මුෂාරෆ් පාකිස්තානයට පැමිණි දින සිට ඔහු අත්අඩංගුවට පත්වීම වළකාලමින් ඔහුගේ නීතිඥයන් ලබාගත් අධිකරණ ඇප තවදුරටත් දීර්ග කිරීමේ හැකියාවක් නොමැති බව ද මහාධිකරණ විනිසුරුවරු මෙහිදී අවධාරණය කළහ.
වසර ගණනාවක් රටින් බැහැරව විදේශයන්හි ජීවත් වූ පාකිස්තානයේ හිටපු ජනාධිපතිරයකු මෙන්ම හමුදාපතිවරයකු ද වූ මුෂාරෆ් පසුගිය මාර්තු 24 වැනිදා පාකිස්තානයට පැමිණියේය.
එම අවස්ථාවේදී මුෂාරෆ් අත්අඩංගුවට ගැනීමට පාකිස්තාන ආරක්ෂක අංශ සූදානම්ව සිටියද ඔහු තම නීතිඥයන් මාර්ගයෙන් අධිකරණයෙන් ඇප ලබා ගැනීමට කටයුතු කළ නිසා ඔහුව අත්අඩංගුවට ගැනීමට නොහැකි විය.