ඩෙංගු වසංගතය උත්සන්න වීමෙන් මේ වනවිට ඩෙංගු රෝගීන් 12,000 ක් හමුවී ඇති බව පාකිස්තාන සෞඛ්‍ය බලධාරීහු නිවේදනය කරති. ගත වූ මාසය ඇතුළතදී එකසිය විසි නව දෙනකු ජීවිතක්ෂයට පත්වූ බව ද වාර්තා වේ. ඩෙංගු රෝගය, පාකිස්තානයේ හිස එසවීම ආරම්භ වූයේ මෝසම් වැසි සමය ඇරැඹීමත් සමඟය. මෝසම් වැසි සමඟ මේ වනවිට පාකිස්තානයේ ප‍්‍රදේශ රැසක් ජලයෙන් යටවී ඇති අතර ලක්ෂයකට ආසන්න පිරිසකට උන්හිටිතැන් අහිමි වී ඇත. වසංගත තත්ත්වයක් ප‍්‍රකාශ කිරීමෙන් පසු ඩෙංගු මර්දන වැඩසටහන් ආරම්භ කළ බවත් ප‍්‍රාන්ත රැුසක අධ්‍යාපන ආයතන, පාසල් සහ විශ්ව විද්‍යාල වසා දැමීමට තීරණය කළ බවත් පාකිස්තාන රජය පවසයි. ඩෙංගු අවදානම් කලාප ලෙස හඳුනාගෙන ඇති ප‍්‍රදේශවල දුමායන කටයුතු දිගින් දිගටම සිදුවෙමින් පවතී. ඩෙංගු මර්දනය කිරීමට ජාත්‍යන්තර සහාය ඉල්ලා සිටීමට පාකිස්තාන රජය තීරණය කර ඇති අතර මේ වනවිටත් අසල්වැසි ඉන්දියාවෙන් සහ ශ්‍රී ලංකාවෙන් විශේෂ වෛද්‍ය කණ්ඩායම් පන්ජාබ් ප‍්‍රාන්තයට පැමිණ සිටින බව ද බලධාරීහු පවසති. මීට අමතරව ජර්මනියෙන් දුමායන උපකරණ කට්ටල තොගයක් සහ ඉන්දියාවෙන් ඖෂධ තොගයක් ද පාකිස්තාන රජයට ලැබී ඇතැයි වාර්තා වේ.
ලාහෝර් නුවරදීය (ඒ.එෆ්.පී.)
දුමායන කටයුතු සිදු කෙරෙමින් ඩෙංගු රෝගීන්ගෙන් රෝහල් පිරී ඇති අයුරු