අබූජාහිදීය (රොයිටර්)
 
නැගෙනහිර නයිජීරියාවේ ගම්මානයකට එල්ල වූ ප්‍රහාරයකින් 50කට ආසන්න පිරිසක් මියගොස් ඇතැයි එරට පොලිසිය සඳහන් කරයි.
 
සෙනසුරාදා සහ ඉරිදා දිනවලදී මෙම ප්‍රහාර එල්ල වී තිබේ. බොහෝමයක් ප්‍රහාර එල්ල කරන්නේ බොකෝ හරාම් සංවිධානයයි. ඊට අමතරව ඉස්ලාමික් ස්ටේට් සංවිධානය ද ගම්මානවලට ප්‍රහාර එල්ල කරන අතර නයිජීරියාව තුළ අයි.එස් සංවිධානයේ ක්‍රියාකාරකම් උත්සන්න වී තිබේ.
 
“සෙනසුරාදා අපට මළසිරුරු 12ක් හමුවුණා. ඉරිදා අපට තවත් 33ක් හමුවුණා” යැයි නැගෙනහිර නයිජීරියාවේ කඩුනා ප්‍රාන්තයේ පොලිස් කොමසාරිස් ඔස්ටින් ඉවාර් පැවැසීය.
 
ප්‍රහාරය එල්ල වී ඇත්තේ කඩුනා ප්‍රාන්තයේ ග්වස්කා ගම්මානයටය. මෙම ගම්මානයට ප්‍රහාරයක් එල්ල වූයේ ඇයි ද යන්න සම්බන්ධයෙන් මෙතෙක් තොරතුරු වාර්තා වී නොමැත. 
 
නයිජීරියාවේ ආරක්ෂාව අඩු ප්‍රදේශවල ප්‍රචණ්ඩ ක්‍රියා උත්සන්න වී තිබෙන අතර පසුගිය කාලය මුළුල්ලේ එවැනි ප්‍රදේශ හා ගම්මාන ඉලක්ක කරගනිමින් ප්‍රහාර එල්ල විය. මෙය එම ප්‍රහාර මාලාවේ එක් ප්‍රහාරයක් යැයි පැවසේ.
 
වත්මන් ජනාධිපති මුහම්මදු බුහාරි 2015 වසරේදී බලයට පත්වූයේ අප්‍රිකාවේ විශාලතම ආර්ථිකය සහ ජනගහනයෙන් වැඩිම රට වන නයිජීරියාවට ආරක්ෂාව ගෙන එන බවට පොරොන්දු වෙමිනි. 
 
කෙසේ නමුත් එම පොරොන්දු ඉටු කිරීමේදී ජනාධිපතිවරයා දුෂ්කර අභියෝගයකට මුහුණ දී සිටී. 
 
එසේ වුවත් ලබන වසරේ පැවැත්වෙන ජනාධිපතිවරණයට ඉදිරිපත් වන බව ද ඔහු විසින් ප්‍රකාශ කරනු ලැබ තිබේ.