ටිබෙට් ආධ්‍යාත්මික නායක දලයි ලාමාතුමන්ගේ රුධිර, මුත‍්‍රා සහ හිස කෙස් සාම්පල එකතු කරමින්, චීන ඒජන්තවරුන් එතුමන්ට අනතුරක් කිරීමට උත්සාහ ගන්නා බවට තොරතුරු අනාවරණය වී ඇතැයි ටිබෙට් බලධාරීහු පවසති. තමා ඝාතනය කිරීමට චීන ඒජන්තවරුන් කුමන්ත‍්‍රණය කරන බව ටිබෙටයෙන් පලාවිත්, හිමාලය කඳු පාමුල ඉන්දියාවට අයත් ධර්මශාලා ආශ‍්‍රමයේ වෙසෙන ටිබෙට් ආධ්‍යාත්මික නායකතුමන් ද මීට පෙර අවස්ථා කිහිපයකදී පවසා ඇත. දලයි ලාමා ඝාතන සැලැස්මට තරුණියන් පිරිසක් ඒජන්තවරුන් ලෙස බඳවා පුහුණුව ලබා දෙන බවත් එම තරුණියන් දලයි ලාමාගේ බැතිමතුන් ලෙස වෙස් ගන්වා එතුමන්ට විපතක් කිරීමට ධර්මශාලා ආශ‍්‍රමයට එවීමට සැලැස්මක් ඇති බවත් ටිබෙට් බලධාරීහු පෙන්වා දෙති. චීනය පවසන්නේ ටිබෙටය ඔවුන්ට අයත් බවය. එහෙත් ටිබෙටය ස්වාධීන රාජ්‍යයක් යැයි පවසමින් ටිබෙට් ජාතිකයෝ නිරන්තරයෙන් චීනයට එරෙහි විරෝධතා පවත්වති. චීන රජයේ අඩන්තේට්ටම්වලට විරෝධය පළ කරමින්, ඉන්දියාවට පිටුවහල් වී සිටින ටිබෙට් ජාතිකයන් 30 දෙනකු මේ වනවිට සිරුරුවලට ගිනි තබාගෙන විරෝධතා පළ කර තිබේ.