ඇෆ්ගන් රජය සහ බටහිර රටවල් සමඟ දීර්ඝ කාලයක් තිස්සේ පවතින අර්බුදයට, සාමකාමී රාජ්‍යතාන්ති‍්‍රක විසඳුමක් සෙවීමේ අරමුණින් ඇෆ්ගන් තලේබාන් සටන්කාමී සංවිධානය, කටාර් රාජ්‍යයේ දෝහාහි පිහිටු වූ සාම කාර්යාලය තාවකාලිකව වසා දැමීමට ඊයේ (10) තීරණය කළේය.
සාම කාර්යාලයේ සිටින තලේබාන් නියෝජිතයන් එය වසා දැමීමට තීරණය කළේ ඔවුන් එම සාම කාර්යාලය හැඳින්වීමට යොදා ගත් නමට ඇෆ්ගන් රජයෙන් දැඩි විරෝධයක් එල්ල වීම නිසාය.
තලේබාන් සංවිධානය තම සාම කාර්යාලය හැඳින්වීමට යොදා ගත්තේ ‘ඇෆ්ගන් එමීර් රාජ්‍යය’ යන නමය. ඒ ඇමෙරිකාවේ අනුමැතිය හිමිවීමෙනි. එහෙත් ඇෆ්ගන් ජනපති හමීඞ් කර්සායිගෙන් ඊට දැඩි විරෝධයක් එල්ල විය.
‘ඇෆ්ගන් එමීර් රාජ්‍යය’ යනු 2001 වසරට, පෙර තලේබාන් පාලනය පවතිද්දී, ඇෆ්ගනිස්තානය හැඳින් වූ නමය.
1996 වසරේ සිට 2001 වසර තෙක් පැවැති එම තලේබාන් පාලනය පෙරළා දැමුණේ ඇමෙරිකාව ප‍්‍රමුඛ නේටෝව ඇෆ්ගනිස්තානය ආක‍්‍රමණය කළ අවස්ථාවේදීය.
මීට අමතරව එම සාම කාර්යාලයට ඇෆ්ගන් වැසියන්ගෙන් විරෝධයක් එල්ල වී ඇත. ‘සාම කාර්යාලයට’ විරෝධය පාමින් කාබුල් නුවර විරෝධතා රැලි ද පැවැත්විණි.
වසර 12 ක් තිස්සේ ප‍්‍රචණ්ඩ කි‍්‍රයා සිදුකරමින් අහිංසක වැසියන් දහස් ගණනින් අමු අමුවේ මරා දැමූ තලේබාන් සංවිධානය සමඟ සාම කතා අවශ්‍ය නැති බවත්, යුද්ධයෙන් ඔවුන් පරාජය කළ යුතු බවත් විරෝධතාවට එක්වන පිරිස් ඇෆ්ගන් රජයට කියා සිටිති.