ඉන්දීය රජය හඳුන්වා දීමට සූදානම් වන නව ආර්ථික ප‍්‍රතිසංස්කරණවලට විරෝධය පාමින් සන්ධාන රජයෙන් ඉවත් වීමට තමන් තීරණය කළ බව ති‍්‍රණමූල් කොංග‍්‍රස් පක්ෂය පවසයි. 2009 වසරේ පැවැත්වුණු මහ මැතිවරණයෙන් පසු, ඉන්දීය අගමැති මන්මෝහන් සිංගේ කොංග‍්‍රස් පක්ෂය ප‍්‍රමුඛ සන්ධාන රජයට ශක්තියක් වූයේ ත‍්‍රිණමූල් පක්ෂයයි. ති‍්‍රණමූල් කොංග‍්‍රසය නියෝජනය කරමින් ඇමැතිවරුන් 6 දෙනකු ඉන්දීය රජයට එක් ව සිටි අතර ඔවුන් ඉල්ලා අස්වීමට තීරණය කළ බවත් ඉල්ලා අස්වීමේ ලිපි නවදිල්ලි අගනුවරදී අගමැති මන්මෝහන් සිංට බාර දීමට නියමිත බවත් ති‍්‍රණමූල් කොංග‍්‍රසයේ පක්ෂ නායිකාව මෙන්ම බටහිර බෙංගාලයේ මහ ඇමැතිනිය ද වන මම්තා බෙනර්ජී පවසයි. තම පක්ෂය රජයෙන් ඉවත් වීමට තමන් තීරණය කළේ අගමැති සිං ඉකුත් සතියේ හඳුන්වා දුන් නව ආර්ථික ප‍්‍රතිසංස්කරණ පැකේජය ජනතා හිතකාමී එකක් නොවන නිසා යැයි ද මහ ඇමැතිනිය අවධාරණය කරයි. එම නව ආර්ථික ප‍්‍රතිසංස්කරණ හරහා විදෙස් සිල්ලර වෙළෙඳ යෝධයන් ලෙස සැලකෙන වෝල්මාට් සහ ටෙස්කෝ යන වෙළෙඳ සමාගම්වලට ඉන්දියාවේ ආයෝජන ආරම්භ කිරීමට අවස්ථාව ලබා දීමට අගමැති සිං සූදානම් වේ. ති‍්‍රණමූල් කොංග‍්‍රසය පවසන්නේ ඒ හරහා ඉන්දීය සිල්ලර වෙළෙඳුන්ට ‘මරු පහරක්’ වනු ඇති බවත් එය රටේ ආර්ථිකය අගාධයට ඇද දැමීමට හේතුවක් වනු ඇති බවත්ය. තම පක්ෂය සන්ධාන රජයෙන් ඉවත්වීමට තීරණය කළේ අගමැති සිංගේ රජය පෙරළා දැමීමට නොවන බව ද මහ ඇමැතිනී බෙනර්ජි අවධාරණය කරයි.මම්තා බෙනර්ජි