තුර්කියේ සිටින සිරියානු සරණාගතයන්ගේ සංඛ්‍යාව 600,000 ඉක්මවන බවත් ඉන් 400,000ක් සරණාගත කඳවුරු වලින් පිටත ජීවත් වන බවත් තුර්කියේ ආපදා කළමනාකරණ ඒජන්සියේ නිලධාරියෙක් පැවසීය. ඔහු තවදුරටත් පවසා සිටියේ පසුගිය හජ් උත්සවයට පෙර මේ පිළිබඳව අධ්‍යයනය කළ බවත් එහිදි අනාවරණය වූයේ තුර්කියේ සිටින සිරියානු සරණාගතයන්ගේ සංඛ්‍යාව වැඩි වී ඇති බවත්ය.

තුර්කිය සිරියාවත් සමඟ කිලෝමීටර 900ක දේශසීමාවක් බෙදාගන්නා අතර තුර්කිය සිරියානු ජනපති බෂාර් අල් අසාද්ගේ රජයට විරුද්ධව සටන් කරන කැරැුලිකරුවන්ට සහය ලබාදෙයි.

සිරියානු සරණාගතයන්ට තුර්කියට ඇතුළු වීමට අවසර ලබාදි ඇති අතර විටෙන් සරණාගතයන්ට ඇතුළු වන දේශ සීමාව වසා දැමීමටද තුර්කි බලධාරීහු කටයුතු කළෝය.

තුර්කිය සිරියා සරණාගතයන් සඳහා ඩොලර් බිලියන දෙකක් පමණ වැය කර ඇති බව තුර්කි වාර්තා සඳහන් කරයි.එක්සත් ජාතීන්ගේ වාර්තා සඳහන් කරන්නේ 2014 වනවිට සිරියානු සරණාගතයන්ගේ සංඛ්‍යාව මිලියන දෙකක් පමණ වියහැකි බවත් තවත් මිලියන 2.25ක් පමණ රට අභ්‍යන්තරයේ අවතැන් වියහැකි බවත්ය.