ලෝකයේ සෑම තත්පර හතකට වරක්  අවුරුදු 15ට අඩු එක් ගැහැණු දරුවකුවත් විවාහ වීමට ලක් වන බව චිල්ඩ්රන් ආයතනය කියයි. ඇෆ්ගනිස්ථානය, යේමනය, සෝමාලියාව සහ ඉන්දියාව වැනි රටවල්හි  අවුරුදු 10 වයසේ පසුවන ගැහැණු දරුවන් පවා වඩා වියපත් පිරිමින්ට විවාහ කර දීම බහුලව සිදුවන බව එම වාර්තාව පෙන්වා දෙයි.

මෙවැනි විවාහ වලදී ඔවුන්ට අහිමි වන්නේ අධ්‍යාපනය පමණක් නොවේ. මවක වීමට සිරුර හැඩගැසී නොමැති බැවින් දරු ප්‍රසූතියකදී සිදුවන ආබාධ වලට මුහුණ පෑමට හෝ සමහරවිට මරණය පවා සිදුවීමට ඇති අවකාශ සම්බන්ධයෙන්ද මෙම වාර්තාව කරුණු දක්වයි.  අධ්‍යාපන අවස්ථා ද දරුවන්ගේ ළමා කාලයද ඔවුන්ට අහිමි කරවන අතර වඩාත් බරපතල කාරණාව වන්නේ ඔවුන් ගෘහාශ්‍රිත හිංසනයන්ට ගොදුරු වීමයි. ස්ත්‍රී දූෂණයන්ට ලක්වීම නිසා මෙම දරුවන් ඒඩ්ස් වැනි රෝග වලට ලක්වූ අවස්ථා ද ඇත.

යුද්ධය, දරිද්‍රතාවය සහ සමාජ ගැටලු බොහෝ අඩු වයස් විවාහ වලට හේතුවක් බව මෙම වාර්ථාවේ දැක්වේ. නයිජර්, චැඩ්, මධ්‍යම අප්‍රිකා සමූහාන්ඩුව, මාලි සහ සෝමාලියාව යන රටවල් වල මෙම තත්වය වැඩි වශයෙන් දක්නට ලැබේ. සියාරා ලියොන් රාජ්‍යයේ ඉබොලා වෛරසය පැතිරීම නිසා පාසල් වසා දැමීම හේතුවෙන් අඩු වයසින් මාතෘත්වයට පත්වීම් 14000ක් පමණ වාර්තා වෙයි.

යුනිසෙෆ් සංවිධානයේ ගණනය අනුව වර්තමානයේ කෝටි 70ක් පමණ වන අඩු වයස් විවාහ සංඛ්‍යාව 2030 වර්ෂය වනවිට කෝටි 95‍ක් පමණ වනු ඇත.  

ලෝකයේ කෝටි 110ක් පමණ වන ගැහැණු දරුවන් සහ ඔවුන් මුහුණදෙන අභියෝග තේමා කරගෙන එක්සත් ජාතීන්ගේ සංවිධානය විසින් ජාත්‍යන්තර ගැහැණු ළමයින්ගේ දිනය ප්‍රකාශයට පත්කර ඇත.