කාශ්මීරය පදනම් කරගනිමින් ක්‍රියාත්මක වන ඉස්ලාමීය දේශපාලන පක්ෂයක් වන ‘ජමාත් ඊ ඉස්ලාමී’ පක්ෂය තහනම් කිරීමට ඉන්දියාව පියවර ගෙන ඇත.

එම පක්ෂය මතභේදාත්මක කාශ්මීර ප්‍රදේශයේ සිටින සටන්කාමීන්ට සහයෝගය දක්වන බවට චෝදනා කරමින් ඉන්දීය රජය එම පියවර ගෙන තිබේ. 

කාශ්මීරයේ පුල්වාමාහිදී ඉන්දීය හමුදා රථ පෙළකට එල්ල කරන ලද මරාගෙන මැරෙන බෝම්බ ප්‍රහාරයෙන් ඉන්දීය පොලිසිය කරන ලද මෙහෙයුම්වලදී එම පක්ෂයට සම්බන්ධ 300කට වැඩි පිරිසක් අත්අඩංගුවට ගත් බව ද ඉන්දීය පොලිස් නිලධාරියෙක් පැවැසීය. 
පෙබරවාරි 14 වැනිදා පුල්වාමාහිදී එල්ල වූ ප්‍රහාරයෙන් ඉන්දීය හමුදා සාමාජිකයෝ 40 දෙනෙක් ජීවිතක්ෂයට පත්වූහ.  ඉන්දීය පාලනයේ තිබෙන කාශ්මීර ප්‍රදේශයේදී එම ප්‍රහාරය එල්ල විය. 
 
පාකිස්තානය කේන්ද්‍ර කරගනිමින් ක්‍රියාත්මක වන ජායිෂ් ඊ මොහොම්මද් සංවිධානය එම ප්‍රහාරයේ වගකීම බාරගෙන තිබිණි. 

එම ප්‍රහාරයෙන් පසු කාශ්මීරයේ දිගින් දිගටම මෙහෙයුම් දියත් කිරීමට ඉන්දීය රජය පියවර ගෙන තිබිණි. 

‘ජමාත් ඊ ඉස්ලාමී’ නිර්මාණය කරන ලද්දේ 1942 වසරේදීය. බෙදුම්වාදී දේශපාලනයේ නිරත වීමට පෙර එම පක්ෂය දශක දෙකකට ආසන්න කාලයක් ඉන්දියාවේ මැතිවරණවලට සහභාගි විය. 
වසර 1989 දී කාශ්මීරයේ ඇති වූ කැරැල්ලෙන් පසු ඔවුන් එලෙස බෙදුම්වාදී දේශපාලනයට එක්විය. 

මීට පෙර දෙවතාවකදී එම පක්ෂයට තහනම් පැනවීමට කටයුතු කර තිබිණි. ජමාත් ඊ ඉස්ලාමී පක්ෂය කාශ්මීරය ඉන්දියාවෙන් නිදහස්  විය යුතු යැයි කියයි. 

රොයිටර් ඇසුරිනි
 

055