දකුණු කොරියාවේ මතබේදයට තුඩු දුන් එක්සත්කමේ දේවස්ථානය නමින් හඳුන්වන නිකායක් විසින් තරුණ යුවළ 3000ක් එකවිට විවාහ කරවීමේ දැවැන්ත විවාහ උත්සවයක් පවත්වා ඇත. මේ විවාහ සිදුකර ඇත්තේ සෝල් නගරයට ඊසාන දිග ගැපෙයොන් හි පිහිටි එම නිකායේ මූලස්ථානයේ දී ය. එකවිට විවාහ වූ මේ තරුණ තරුණියන් 6000ක් දෙනා ලොව විවිධ රටවලින් පැමිණි අනුගාමිකයෝය. 

විවාහ වූ මේ යුවල අතරින් බොහෝ දෙනකු එකිනෙකා මුණගැසී ඇත්තේ විවාහ උත්සවයට දින කිහිපයකට පෙර වීම ද විශේෂයකි. මොවුන් එකිනෙකා හඳුන්වා දී ඇත්තේ ද පල්ලියේ බලධාරීන් විසිනි. මෙවැනි දැවැන්ත විවාහ 1960 සිට වරින් වර මේ නිකාය විසින් සිදුකර තිබීම ද විශේෂත්වයකි.

මේ නිකාය ආරම්භ කර ඇත්තේ සන් මියොන් මූන් නමැති අයකු විසිනි. ඔහු මිනිසුන්ගේ මොළ ශෝධනයට ලක්කරන්නේ යැයි චෝදනා එල්ල වී තිබිණි. ඔහු 2013 වර්ෂයේ දී මියගිය අතර ඒ වනවිට 92 වැනි වියේ පසුවූයේය.

මේ නිකායේ අනුගාමිකයන් හඳුන්වන්නේ ද මූනිස් නමිනි. ඔවුහු තම නිකායේ ආරම්භකයා දේවත්වයෙන් සලකති. එම නිකාය විවේචනය කරන්නන් පවසන්නේ ඔහු වංචා කරුවකු බවයි.

මූන් ගේ වැන්දඹු බිරිඳ අලුතෙන් විවාහ පත් සියළුම ජෝඩුවලට ආශිර්වාද කළාය.