ඇෆ්ගනිස්තානයේ කාබුල් නුවර ෂියා මුස්ලිම් පල්ලියක් අසල සිදුවු මරාගෙන මැරෙන බෝම්බ ප්‍රහාරයකින් හත්දෙනෙකු මියගොස් තවත් හත්දෙනෙකු තුවාල වූ බවට විදෙස් මාධ්‍ය වාර්තා කරයි.
 
පාකිස්තාන ස්වදේශ කටයුතු අමාත්‍යාංශයේ නියෝජ්‍ය ප්‍රකාශකයෙකු වන නස්රාත් රහීම් ප්‍රකාශ කරනුයේ 1995 වර්ෂයේදී තලේබාන් සංවිධානය විසින් මරාදමනු ලැබූ ෂියා මුස්ලිම් හෂාරා ජන කොට්ඨාශයට අයත් නායකයකු වූ අබ්දුල් අලී මෂාරි අනුස්මරණය සඳහා පවත්වනු ලැබූ දේව මෙහෙයකට ඇතුල්වීමට උත්සාහ කිරීමේදී මෙම බෝම්බය පුපුරුවාගෙන ඇති බවයි.
 
මෙම ප්‍රහාරයේ වගකීම කිසිවකු බාරගෙන නොමැති නමුත් එරට ආරක්ෂක බලධාරීන් සැකකරනුයේ තලේබාන් සංවිධානය හෝ එරට ක්‍රියාත්මක ඉරාක ඉස්ලාමීය රාජ්‍ය සංවිධානය (ISIS) විසින් මෙම ප්‍රහාරය දියත් කරන්නට ඇති බව විදෙස් මාධ්‍ය මේ වනවිට වාර්තාකර ඇත.
 
මෙම ප්‍රහාරය එල්ල වූයේ එරට ජනාධිපති අශ්රෆ් ගානි වසර 16 ක් පුරා පවතින එරට සිවිල් යුද්දයේ මෙම අදියර අවසන් කිරීමට පිණිස සාම සාකච්ඡා සඳහා තලේබාන් සංවිධානයට ආරාධනා කොට සති දෙකක් ගතවන්නටත් මත්තෙන් වීම විශේෂත්වයකි.