කැනඩාවේ සිට ඇමෙරිකාවට බොර තෙල් ප‍්‍රවාහනය කිරීමට යෝජිත නළ මාර්ගයකට විරෝධය පළ කරමින් දහස් ගණනක් ඇමෙරිකානුවෝ පෙරේදා (6) ධවල මන්දිරය වට කළහ. විරෝධතා පුවරු අතැතිව, ජනාධිපති බැරැුක් ඔබාමාට සහ ඔබාමා පරිපාලනයට දොස් පැවැරූ විරෝධතාකරුවන් පෙන්වා දුන්නේ එම බොර තෙල් නළ මාර්ගය ඉදිකළහොත් මහා පාරිසරික විනාශයක් සිදුවනු ඇති බවය. ඇමෙරිකා ජනපති නිල නිවස පමණක් නොව මහා භාණ්ඩාගාරය ද පිහිටා ඇත්තේ ධවල මන්දිර භූමියේය. විරෝධතාකරුවන් ධවල මන්දිරය වට කිරීමට සූදානම් වන බව කල්තියා දැන ගැනීමත් සමඟ වොෂින්ටන් පොලිස් නිලධාරීන් සීරුවෙන් තැබීමට බලධාරීහු පියවර ගෙන තිබුණි. කෙසේ නමුත් සාමකාමී අයුරින් විරෝධතාව පැවැත් වූ හෙයින් පොලිසිය සහ විරෝධතාකරුවන් අතර ගැටුමක් හට නොගැනුණි. ‘තෙල් වැලි’ මිරිකා නිපදවා ගන්නා බොර තෙල් මෙම නළ මාර්ගය ඔස්සේ කැනඩාවේ සිට ඇමෙරිකා එක්සත් ජනපදයට ප‍්‍රවාහනය කිරීමට අපේක්ෂිතය. වැලි මිරිකා තෙල් ලබා ගැනීමේදී කාබන් වායුව විශාල වශයෙන් වායුගෝලයට එකතු වන බව පරිසරවේදීහු ද  පෙන්වා දෙති. පරිසරවේදීන් සිය ගණනක් ද සහභාගී වූ බව ඇමෙරිකා පුවත් සේවා වාර්තා කරයි. ලබන වසරේ, එනම් 2012 දී ජනාධිපති බැරැක් ඔබාමා යළිත් වරක් ජනාධිපති ධුරයට තරග කිරීමට නියමිත අතර මෙම බොර තෙල් නල මාර්ගය සම්බන්ධ අර්බුදය ඔහුට අවාසියක් වනු ඇතැයි දේශපාලන විචාරකයෝ පෙන්වා දෙති. බොර තෙල් නළය සම්බන්ධ යෝජනාව කි‍්‍රයාත්මක කළොත් ඇමෙරිකානුවන්ට රැුකියා අවස්ථා උදාවනු ඇති අතර රටේ බලශක්ති නිෂ්පාදන කටයුතු ද ඉහළ දැමීමට ඇමෙරිකා රජයට හැකියාවක් ලැබේ. කෙසේ නමුත් බොර තෙල් නළ මාර්ගය සම්බන්ධ යෝජනාවට ජනපති ඔබාමාගේ පාලක ඩිමොක‍්‍රටික් පාක්ෂිකයන් කිහිප දෙනකුගෙන් ද විරෝධයක් එල්ල වී ඇත. මීට අමතරව ජනපති ඔබාමා, කාලගුණ විපර්යාස සම්බන්ධයෙන් අනුගමනය කරන ප‍්‍රතිපත්තිවලට ද ඩිමොක‍්‍රටික් පාක්ෂිකයන්ගේ අකමැත්ත පළ වී ඇතැයි වාර්තා වේ.