ඕස්ට්‍රේලියාවේ ‘තන්ඩර්ස්ටෝම් ඇත්ස්මා’ තත්ත්වයෙන් මියගිය අට දෙනා අතර ශ්‍රී ලාංකිකයකු වන බව විදෙස් මාධ්‍ය වාර්තා කරයි. 

මියගිය ශ්‍රී ලාංකිකයා පනස් අට හැවිරිදි රංජිත් පීරිස් නැමත්තකු වන අතර ඔහු රෝහල්ගතව ප්‍රතිකාර ලබමින් සිටියදී එසේ ජීවිතක්ෂයට පත්ව ඇත. 

ඕස්ට්‍රේලියාවට පසුගිය සතියේ බලපෑ කුණාටු තත්ත්වයෙන් පසු කාලගුණ තත්ත්වය වෙනස් වී ඇති අතර එයින් ද ඕස්ට්‍රේලියා  වැසියන් පීඩාවට පත්ව ඇතැයි වාර්තා විය.

මේ තත්ත්වයෙන් වැඩි බලපෑමක් සිදු ව තිබුණේ ඕස්ට්‍රේලියාවේ දෙවැනි විශාලතම නගරය වූ මෙල්බර්න් නුවරටත් වික්ටෝරියා ප්‍රාන්තයටත් යැයි ද විදෙස් මාධ්‍ය වාර්තා කළේය. 

කුණාටු තත්ත්වයත් ඉන් පසු ඇති වූ කාලගුණ වෙනස්වීම් සම්බන්ධයෙන් එරට බලධාරීන් ජනතාව දැනුම්වත් කර නැතැයි ද එරට මාධ්‍ය පවසයි.

 කුණාටු තත්ත්වයෙන් පසු ජනතාවට හුස්ම ගැනීමේ අපහසුතා ඇති වු නිසා  දහස් ගණන් රෝහල්ගත වී ප්‍රතිකාර ලැබූ අතර එම සංඛ්‍යාව 8,500ක් පමණ වු බව බලධාරීහු කියති.

ඇති වූ හදිසි තත්ත්වය නිසා ඕස්ට්‍රේලියා ලධාරීන්ට සෞඛ්‍ය අනතුරු ඇඟවීම් නිකුත් කිරීමට සිදු විය. 

“මගේ තාත්තට සිහිය නැති වුණා. විනාඩි හතළිස් පහක් විතර ඔහු සිහිය නැතිව හිටියා. ඔහුට හුස්ම ගන්න බැරි වුණා” යැයි රංජිත් මහතාගේ පුතා පවසයි.

තන්ඩස්ටෝම් ඇස්මා නැමැති ඇදුම රෝගී තත්ත්වය ඇතිවනුයේ ඉහළ පරාග හා ඉහළ ආර්ද්‍රතාවක් ඇති අවස්ථාවකදීය. කුණාටුවෙන් පසු ඇති වන වර්ෂාව ද, සුළඟේ පාව යන පරාග කොටස් ද ඊට හේතු වේ. මෙම පරාග කොටස් පෙනහලුවලට ඇතුළු වී හුස්ම ගැනීමේ අපහසුතා ඇති කරයි. 

විදෙස් මාධ්‍ය ඇසුරිනි