ඊජිප්තුවේ සිදුවූ හමුදා කුමන්ත‍්‍රණයෙන් පසු, බලයෙන් නෙරපා අත්අඩංගුවට ගනු ලැබූ ජනපති මොහොමඞ් මොර්සිගේ ආධාරකරුවන් පිරිසක් සහ ආරක්ෂක අංශ අතර ඊයේ (3) දරුණු ගැටුම් ඇවිළී ගියේය.

ගැටුම් ඇවිළී ගියේ සූවස් නගරයේ ය. මොර්සි ආධාරකරුවන්ට මුස්ලිම් සහෝදරත්වය පක්ෂ කි‍්‍රයාකාරීන්ගේ ද සහාය හිමිවූයේ යැයි ඊජිප්තු ආරක්ෂක අංශ කියා සිටී.

මොර්සි ජනතා ඡුන්දයෙන් බලයට ආවේ, දීර්ඝ කාලයක් තිස්සේ ජනපති ධුරයේ සිටි හොස්නි මුබාරක්ගේ ඉවත්වීමෙන් පසු ඊජිප්තුවේ පැවැත්වුණු ප‍්‍රථම ප‍්‍රජාතන්ත‍්‍රවාදී මැතිවරණයෙනි.  

ජනපති ධුරයට පත්වීමෙන් පසු මොර්සි, එරට හමුදා පාලක මණ්ඩලය සමඟ ගැටුණේය. ඔවුන්ගේ බලතල කප්පාදු කිරීමට ද උත්සහ කළේය. මොර්සි තරයේ කියා සිටියේ ඊජිප්තුවට හමුදා බලය අවශ්‍ය නැති බවය.

හමුදා පාලකයන් සහ මොර්සිගේ රජය අතර අර්බුදයක් නිර්මාණය වූයේ එම අවස්ථාවේදීය. එය හමුදා කුමන්ත‍්‍රණය තෙක් දුර දිග ගියේය.