එර්බිල් (ඒ.එෆ්.පී).
 
ස්වයං පාලනයක් සහිත ඉරාකයේ කුර්දි පළාතට නිදහස දිනා ගැනීම සඳහා පැවැති ජනමත විමසුමෙන් පසු ඉරාක ජනාධිපති හයිදර් අල් අබාදි සහ කුර්දි නායක මසූද් බර්සානි අතර උණුසුම් වචන හුවමාරුවක් සිදුව ඇතැයි වාර්තා වේ. 
 
කුර්දි පළාතට නිදහස දිනාගැනීම උදෙසා පසුගිය 25 වැනි දා ජනමත විමසුමක් පැවැත්විණි. එහි ප්‍රතිඵල දැන් නිකුත් වෙමින් පවතින අතර බොහෝ දෙනකු කුර්දිස්තාන පළාතට නිදහස දිනාගැනීම වෙනුවෙන් ඡන්දය භාවිත කර ඇතැයි ද පැවසේ. 
 
කුර්දිස්ථාන ජනමත විමසුමේ ප්‍රතිඵලය ‘ඔව්’ වුවද කිසිදු අවස්ථාවකදී ඒ සම්බන්ධයෙන් සාකච්ඡාවලට නොයන බව ඉරාක අගමැතිවරයා ප්‍රකාශ කර තිබේ. ජනමත විමසුමට ඉරාක අගමැතිවරයා ප්‍රමුඛ ආණ්ඩුවේ සහ එරට පාර්ලිමේන්තුවෙන් දැඩි විරෝධයක් එල්ල විය. එපමණක් නොව අසල්වැසි රටවල් වන ඉරානය, තුර්කිය ඇතුළු ජාත්‍යන්තරයෙන්ද විරෝධය එල්ල විය. කෙසේ නමුත් කුර්දිවරුන්ට වෙනම රාජ්‍යයක් පිහිටුවීම සඳහා සහාය වන බව ඊශ්‍රාය අගමැති බෙන්ජමින් නෙදන්යාහු මීට දින කිහිපයකට පෙර ප්‍රකාශ කළේය. 
 
‘සාකච්ඡාවලට තිබෙන දොර වහන්න එපා. සියලු අර්බුදවලට විසඳුම සාකච්ඡාව” යැයි කුර්දි පළාතේ අගනුවර වන එර්බිල්හිදි ප්‍රකාශය කළේය. ඔහු අදහස් දක්වන අවස්ථාවේදී එය සජිවීව විකාශය කරන ලදි. ‘අපි සාකච්ඡාවලට විවෘතයි. ඒ බව ජාත්‍යන්තර ප්‍රජාවට කිව යුතු” යැයි ද කුර්දි නායකයා පැවැසීය. 
 
ඉරාක රජයේ පාලනයට අනුව කටයුතු නොකළහොත් කුර්දි පළාතේ එර්බිල් සහ සුලෙයිමනියාහ් හි පිහිටි ගුවන් තොටුපොළ දෙක දින තුනක් ඇතුළත දී වසා දමන බවත් එම ගුවන් තොටුපොළවලට ජාත්‍යන්තර ගුවන් යානා නවතා දැමීමට කටයුතු කරන බව ද කීවේය. 
 
‘ව්‍යවස්ථාවට අනුව අපි කටයුතු කරනවා. ඒ අනුව අවශ්‍ය වුවහොත් නීතිමය පියවර ගන්නවා. අපි සාකච්ඡාවලට සූදානම්. එහෙත් ජනමත විමසුම හෝ එහි ප්‍රතිඵලවලට අනුව සාකච්ඡා පවත්වන්නේ නැහැ. අපි අපේ සමඟය එකමුතුව දිගින් දිගටම පවත්වාගෙන යා යුතුයි. අපේ වගකීම් ඉටු කළ යුතුයි. ඉරාකයේ ස්වෛරීත්වය කිසිදු අවස්ථාවක පහත හෙළන්නේ නැහැ. අපේ ජාතික වගකීම් ඉටු කරනවා” යැයි ද ඉරාක අගමැතිවරයා වැඩිදුරටත් ප්‍රකාශ කළේය. 
 
(055)