කාම්බෝජයේ පැවැත්වෙන නැගෙනහිර ආසියානු රටවල රාජ්‍ය නායක සමුළුව හෙවත් ‘ආසියාන්’ සමුළුවට සමගාමීව මියන්මාර ජනපති ත්වෙන් සහ ඇමෙරිකා රාජ්‍ය ලේකම් හිලරි ක්ලින්ටන් අතර විශේෂ හමුවක් ඊයේ (13) පැවැත්විණි. එම හමුව පැවැත්වූයේ කාම්බෝජයේ සංචාරක පුරවරය ලෙස සැළකෙන සියෙම් රීප් නුවරදීය. විදෙස් මාධ්‍ය වාර්තා කර තිබුණේ එය දෙරටටම ඉතා වැදගත්  රාජ්‍යතාන්ති‍්‍රක හමුවක් වූ බවය. හමුව පැවැත්වූයේ ඇමෙරිකා ජනපති බැරැුක් ඔබාමා මියන්මාරයට නව ඇමෙරිකා තානාපතිවරයකු පත් කර එවීමත්, මියන්මාරයට එරෙහිව පනවා තිබූ ආර්ථික සහ වෙළෙඳ සම්බාධක තව තවත් ලිහිල් කිරීමත් සමඟය. මියන්මාරයට ඇමෙරිකාවෙන් තානාපතිවරයකු පත් කෙරුණේ වසර 22 කට පසුවය.  මියන්මාරයේ තනාපති ලෙස පත්වූයේ ආසියා පැසිෆික් කලාපීය කටයුතු සම්බන්ධ ඇමෙරිකානු විශේෂ නියෝජිතවරයා ලෙස කටයුතු කළ ඩෙරික් මිචෙල්ය. ආර්ථික සහ වෙළෙඳ සම්බාධක ලිහිල් කළ නිසා ඇමෙරිකා සමාගම්වලට මියන්මාරය සමඟ ආයෝජන අවස්ථා ඇති කර ගැනීමට ඉඩ සැලැසී තිබේ. මියන්මාරයේ දළදඩු හමුදා පාලනයක් පැවැති සමයේදී  ඇමෙරිකාව මියන්මාරය සමඟ රාජතාන්ති‍්‍රක සම්බන්ධකම් අත් හැරියේය. මියන්මාරයේ හමුදා පාලනය අවසන් වීමෙන් පසු වර්තමානයේ පවතින්නේ සිවිල් රජයකි. එම සිවිල් රජය දේශපාලන ප‍්‍රතිසංස්කරණ රාශියක් හඳුන්වා දී ඇති අතර ඒවා ඇමෙරිකාවේ පැසැසුමට ලක් වී ඇත. මියන්මාරයට එරෙහි සම්බාධක ලිහිල් කිරීමට ඇමෙරිකා රජය තීරණය කර ඇත්තේ  එහෙයිනි.