ටෙ‍්‍රවොන් මාටින් නමැති 17 හැවිරිදි කළු ජාතික තරුණයා වෙඩි තබා ඝාතනය කළ සුදු ජාතික ආරක්ෂක නිලධාරී ජෝර්ජ් සිමන්මර්, නිර්දෝෂී යැයි ෆ්ලොරීඩාහි සැන්ෆර්ඞ් නුවර අධිකරණය ලබා දුන් තීන්දුවට විරෝධය පාමින් ඊයේ (21) ඇමෙරිකාවේ නගර සියයක විරෝධතා පැවැත්විණි.
ඒ සෑම විරෝධතා රැලියකටම කළු ජාතිකයන් දෙදහසකට ආසන්න පිරිසක් එක් වී සිටියේ යැයි ඇමෙරිකා මාධ්‍ය වාර්තා කළේය.
ජෝර්ජ් සිමන්මර්, ටෙ‍්‍රවොන් මාටින්ට වෙඩි තැබුවේ මංකොල්ලකරුවකු යැයි සිතාය. ඒ 2012දී ටෙ‍්‍රවොන් මාටින් සුපිරි වෙළෙඳ සැළකට හොරෙන් ඇතුළු වූ අවස්ථාවකදීය. ඝාතන සිද්ධියෙන් පසු, ජෝර්ජ් සිමන්මර් අත්අඩංගුවට ගත් අතර නඩු විභාගය ඇරැඹිණි.
ටෙ‍්‍රවොන් මාටින්ට, සිමන්මර් වෙඩි තැබුවේ ඔහු කළු ජාතිකයකු වීම නිසා බවත්, එය වර්ණවාදී ප‍්‍රචණ්ඩ කි‍්‍රයාවක් බවත් පසුව අනාවරණය විය. සිමන්මර් යනු කළු ජාතිකයන් ගැන වෛරයකින් පසුවන ඇමෙරිකන් සුදු ජාතිකයකු බව ද හෙළිවිය.
සිමන්මර් සම්බන්ධයෙන් පැවැත් වූ නඩු විභාගය අවසානයේ දී වරදකරු වූයේ සිමන්මර් නොව ඝාතනය වූ ටෙ‍්‍රවොන් මාටින් බවට විරෝධතාකරුවෝ චෝදනා කරති.
ප‍්‍රථම කළු ජාතික ඇමෙරිකන් ජනපති ලෙස බැරැක් ඔබාමා විශේෂ ප‍්‍රකාශයක් කරමින් කියා ඇත්තේ නීතිය අකුරට පිළිපැඳීමට කටයුතු කළ යුතු බවය. ඔහු විරෝධතාකරුවන්ගෙන් ඉල්ලීමක් කර ඇත්තේ සාමකාමීව හැසිරෙන ලෙසටය.